30 сакавіка, Позірк. “Расія адмаўляе права на існаванне Беларусі і беларускага народа”, — заявіў на сваім ютуб-канале 30 сакавіка намеснік кіраўніка Аб’яднанага пераходнага кабінета, кіраўнік Народнага антыкрызіснага ўпраўлення Павел Латушка.
Так ён пракаментаваў заклік “Сусветнага рускага народнага сабора” “вярнуцца да існуючай больш за тры стагоддзі дактрыны трыадзінства рускага народа”, які прагучаў у яго наказе ад 28 сакавіка.
Арганізацыя абвясціла Украіне “ні многа ні мала — “святую вайну”, гэта значыць, атрымліваецца, “джыхад”, — сказаў Латушка.
“Удумайцеся, гэта зрабілі не якія-небудзь тэрарысты з ісламісцкіх груповак на Блізкім Усходзе, гэта зрабіла сход пад кіраўніцтвам прадстаяцеля адной з найбуйнейшых хрысціянскіх цэркваў”, — дадаў палітык.
У наказе “сабора” таксама адмаўляецца існаванне ўкраінцаў і беларусаў як асобных народаў, адзначыў экс-дыпламат: “Знішчэнне незалежнасці Украіны і Беларусі аўтары наказу лічаць ключавымі ўмовамі выжывання і паспяховага развіцця Расіі і так званага “рускага свету” ў XXI стагоддзі”.
Кіраўнік НАУ параўнаў гэта з палітыкай чарнасоценцаў у пачатку мінулага стагоддзя.
“На жаль, цяперашняе кіраўніцтва РПЦ, кананічнай часткай якой на сёння з’яўляецца і праваслаўная царква ў Беларусі, усё больш і больш уцягваецца ў рэалізацыю ваенна-палітычных мэт Крамля і рэжыму Лукашэнкі, апраўдваючы ваенную агрэсію, гвалт і адмаўляючы права на самастойнае існаванне асобных краін і народаў. Тым самым кіраўніцтва царквы само, сваімі ж рукамі падрывае да яе давер з боку грамадства”, — лічыць Латушка.
У Беларусі многія праваслаўныя, прадстаўнікі святарства і манаства не падтрымліваюць “рэакцыйныя ідэі цяперашняга вышэйшага кіраўніцтва РПЦ”, сцвярджае ён, многія святары выступалі з антываеннымі пропаведзямі пасля пачатку поўнамаштабнага ўварвання расійскіх войскаў ва Украіну У 2022 годзе.
“Многія ўсталі ў 2020 годзе на бок беларускага грамадства, якое рэжым Лукашэнкі масава рэпрэсаваў, – падкрэсліў Латушка. — Тым не менш, кіраўніцтва праваслаўнай царквы Беларусі афіцыйна братаецца і ўсяляк супрацоўнічае з рэжымам Лукашэнкі, а таксама падтрымлівае агрэсію Расіі супраць Украіны”.
Палітык па-беларуску звярнуўся да кіраўніцтва Беларускай праваслаўнай царквы з просьбай “публічна адмовіцца ад падтрымкі сумнеўных палітычных заяваў, якія зыходзяць з Масквы, ці хаця б максімальна дыстанцыявацца ад іх”.
