Беларус выправаджаны з Польшчы за перавозку нелегальных мігрантаў

2 красавіка, Позірк. На польска-нямецкай мяжы затрыманы грамадзянін Беларусі, які перавозіў двух нелегальных мігрантаў з Егіпта.

Як паведамляе Памежная ахова Польшчы, на тэрыторыю Еўрасаюзу мігранты трапілі з Беларусі.

Ведамства адзначае, што 29 сакавіка польскія памежнікі спынілі аўтамабіль “Мэрсэдэс”, якім кіраваў 36-гадовы мужчына, ён “спрабаваў нелегальна перавезці двух грамадзян Егіпта ў Германію”.

“Ніякіх дакументаў, якія пацвярджаюць законнасць знаходжання ў Польшчы, у егіпцян не было, — гаворыцца ў паведамленні.

Затрыманыя прызналі факт перасячэння беларуска-польскай мяжы і спробу перасекчы польска-нямецкую мяжу без неабходных дакументаў. Грамадзян Егіпта прыгаварылі да 8 месяцаў пазбаўлення волі ўмоўна з адтэрміноўкай на тры гады, пасля чаго ім “былі выдадзеныя пастановы, якія абавязваюць вярнуцца ў краіну, дзе яны маюць права на пражыванне”.

Кіроўца аўтамабіля, як заяўляецца, прызнаў віну ў садзейнічанні нелегальнай міграцыі, ён прыгавораны да 8 месяцаў пазбаўлення волі ўмоўна са штрафам у памеры 6 тыс. злотых (каля 1.500 долараў. — “Позірк”.). Аўто канфіскаванае як “прылада злачынства”.

“Грамадзянін Беларусі атрымаў пяцігадовую забарону на ўезд у Шэнгенскую зону, а таксама пастанову аб выдварэнні з Польшчы. Супрацоўнікі памежнай службы правялі яго да памежнага пераходу на польска-беларускай мяжы і выправадзілі з краіны”, — паведамляе памежнае ведамства.

25 сакавіка намеснік міністра абароны Польшчы Цэзарый Томчык заявіў, што з пачатку міграцыйнага крызісу зафіксавана больш за 80 тыс. спробаў нелегальнага перасячэння мяжы з боку Беларусі, затрымана больш за 42 тыс. чалавек. “Асноўныя напрамкі перакідання мігрантаў не змяніліся і не адбылося ніякіх зменаў у тактыцы дзеянняў”, — канстатаваў ён.

Паводле звестак інспекцыі забеспячэння Узброеных сіл Польшчы, выдаткі на гарантаванне бяспекі на польска-беларускай мяжы ў 2021–2023 гадах склалі амаль 1,5 млрд злотых (каля 375 млн долараў). “Чаканыя выдаткі ў 2024 годзе складуць 850 млн злотых. Крыніцай з’яўляецца бюджэт Міністэрства нацыянальнай абароны”, — адзначыў Томчык.

З ліпеня 2021 года да аховы мяжы было прыцягнута 5,6 тыс. вайскоўцаў, у 2022-м — 6,7 тыс., 2023-м — 3 тыс., з пачатку 2024-га —4,6 тыс. За гэты час “было выстаўлена 280 тыс. наглядальных пастоў і арганізавана больш за 250 тыс. патрулёў”, сказаў намеснік міністра.

Міграцыйны крызіс на мяжы Беларусі і краін ЕС працягваецца з вясны 2021 года.