Па выніках трохбаковых перамоваў дэмсілы дасягнулі “пэўных дамоўленасцяў” наконт выбараў у КР

2 красавіка, Позірк. “Лідарскі склад трох суб’ектаў” дэмакратычных сіл правёў 2 красавіка “грунтоўныя перамовы”, па выніках якіх “дасягнутыя пэўныя дамоўленасці, рэалізацыя якіх павінна пазітыўна паўплываць на сітуацыю вакол выбараў у Каардынацыйную раду (КР)”, паведамляе прэс-служба Аб’яднанага пераходнага кабінета (АПК).

З заявы вынікае, што бакамі ў перамовах выступілі КР, АПК і офіс Святланы Ціханоўскай.

Адзначаецца, што “дамоўленасці будуць выкананыя дзеючым кіраўніцтвам КР”, у сувязі з гэтым кабінет і офіс прынялі рашэнне прыпыніць камунікацыю са СМІ па пытаннях выбараў.

Раней 2 красавіка АПК і офіс Ціханоўскай распаўсюдзілі сумесную заяву, у якой сцвярджалася, што анансаваныя выбары ў КР “не падрыхтаваныя”.

У заяве гаварылася, што “не створаная выбарчая камісія і платформа для галасавання, якая б выключала магчымыя маніпуляцыі”.

“Пры неналежнай падрыхтоўцы выбары ў Каардынацыйную раду не забяспечаць шырокі ўдзел розных груп дэмакратычных сіл і беларускага грамадства, празрыстасць і дакладнасць вынікаў”, — падкрэслівалася ў рэлізе.

Адзначалася, што рашэнні аб правядзенні выбараў павінны быць “прынятыя сумесна ўсімі асноўнымі палітычнымі актарамі, для гэтага была сфарміраваная ўпаўнаважаная рабочая група”.

“Гэта неабходна для захавання адзінства дэмакратычных сіл і для таго, каб кампанія выбараў у КР стала значнай падзеяй для беларускага грамадства”, — падкрэслілі АПК і офіс Ціханоўскай.

Пазней на прэс-канферэнцыі спікер Каардынацыйнай рады Андрэй Ягораў не пагадзіўся з прадстаўленай пазіцыяй, заявіўшы, што выбарчая сістэма была ўзгодненая з кабінетам і офісам Ціханоўскай.

Паводле яго слоў, “гэта фактычна тая сістэма, якая была раней прапанаваная АПК і офісам ” — прапарцыйныя выбары па спісах, кожны выбаршчык мае адзін голас, ёсць гендэрныя квоты. “Гэта значыць, на ўзроўні выбарчай сістэмы ўсё ўзгоднена”, — сказаў Ягораў.

Ён падкрэсліў, што ў адпаведнасці з “правіламі і палажэннямі” КР выбарчая камісія будзе сфарміраваная ў бліжэйшы час, а тэхнічная платформа для галасавання створаная і праходзіць тэставанне.

“Таму казаць аб непадрыхтаванасці выбараў не даводзіцца”, — адзначыў спікер. Паводле яго сцвярджэння, рух да выбараў у КР стрымліваюць “больш бюракратычныя перашкоды”, чым “рэальныя праблемы ў арганізацыі кампаніі”.

Галасаванне па выбарах членаў Каардынацыйнай рады трэцяга склікання запланаванае на 25–28 траўня 2024 года. Чакаецца, што першыя вынікі будуць абвешчаныя не пазней за 29 траўня.

Раней КР паведаміў, што да 15 красавіка павінен завяршыцца працэс фарміравання спісаў выбарчых участкаў і падачы дакументаў на рэгістрацыю ў камісію. Апошняя дата рэгістрацыі кандыдатаў — 22 красавіка.

Агітацыя пройдзе з 25 красавіка па 25 траўня. На падачу і разгляд скаргаў закладзены перыяд з 29 траўня па 8 чэрвеня, у гэты ж дзень будуць абвешчаныя канчатковыя вынікі выбараў.

Першае пасяджэнне Каардынацыйнай рады трэцяга склікання чакаецца 15 чэрвеня.