З пачатку года ў Беларусі забіта не менш як тры жанчыны — ахвяры хатняга гвалту
4 красавіка, Позірк. З пачатку года ў Беларусі забіта не менш за тры жанчыны — ахвяры хатняга гвалту, сведчыць праведзены “Позіркам” аналіз інфармацыі прэс-службы Следчага камітэта (СК).
4 красавіка СК паведаміў пра забойства 44-гадовай жанчыны ў Гродне, якое адбылося ў сакавіку. Паводле адной з версій следства, яе збіў, а затым задушыў 51-гадовы муж, які пасля гэтага наклаў на сябе рукі. Згодна са звесткамі СК, незадоўга да здарэння паміж сужэнцамі адбыўся канфлікт, аднак яны прымірыліся і працягнулі жыць разам. Мужчына да крымінальнай адказнасці не прыцягваўся. У мужа і жонкі дзве дарослыя дачкі, якія жывуць за мяжой.
26 сакавіка ў Мінску, паводле папярэдніх звестак СК, 73-гадовы мужчына некалькі разоў ударыў сваю 71-гадовую жонку нажом, пасля чаго выкінуўся з акна. Жанчына памерла.
Раніцай 15 сакавіка ў Століне (Брэсцкая вобласць) 38-гадовы мужчына забіў сваю 39-гадовую жонку. Пра тое, што адбылося, бацькам мужчыны паведаміў яго 11-гадовы сын. У загінулай былі множныя траўмы галавы. На кухні былі замытыя сляды крыві і меркаваная прылада злачынства — сякера. Пасля забойства мужчына паспрабаваў скончыць жыццё самагубствам, на хуткасці 180 км/г ён урэзаўся на аўтамабілі ў стэлу на ўездзе ў горад, але пасля гэтага выжыў.
14 сакавіка 60-гадовы жыхар Бабруйску (Магілёўская вобласць) у парыве рэўнасці ледзь не падарваў дом, дзе знаходзілася яго нядаўняя сужыцелька са сваім мужам. Абышлося без ахвяр.
Адказваючы на пытанне, ці неабходны ў Беларусі закон аб супрацьдзеянні хатняму гвалту, старшыня Мінскай гарадской арганізацыі Беларускага саюза жанчын, начальнік галоўнага ўпраўлення ідэалагічнай працы і па справах моладзі Мінгарвыканкама Вольга Чамаданава сказала 6 сакавіка, што беларусы жывуць у бяспечнай краіне дзякуючы “працы праваахоўных органаў” .
Чамаданава, якая да 2021 года працавала прэс-сакратаром МУС, а да таго — у інспекцыі па справах непаўналетніх, са здзіўленнем спытала: “Хіба мы маем перадумовы? Каб адказаць на гэтае пытанне, трэба прааналізаваць статыстыку, даведацца, наколькі ў нас гэта (хатні гвалт . — “Позірк”.) пераважае. Нараджэнне любога законапраекта мусіць быць абгрунтаваным”.
Розным відам хатняга гвалту падвяргаюцца 17,6% беларускіх гараджанак, якія маюць партнёра, сведчаць даныя апытання, праведзенага анлайн-лініяй для пацярпелых ад хатняга гвалту oliviahelp.org пры дапамозе Chatham House.
Паводле даных МУС, штогод фіксуецца каля 80 тыс. паведамленняў пра хатні гвалт. На прафілактычным уліку стаіць 21 тыс. чалавек, якія чынілі гвалт дома.
Летась 21 сакавіка Аляксандр Лукашэнка на пашыранай нарадзе з прадстаўнікамі сілавога блока заявіў, што трэба “выкарчоўваць з <…> грамадства самымі жорсткімі метадамі” гвалт над жанчынамі і дзецьмі. Паводле яго слоў, барацьба з гэтай з’явай павінна стаць такой жа, як барацьба з тэрарызмам.
Пры гэтым праз атаку дзяржавы на не звязаныя з уладамі няўрадавыя арганізацыі ў краіне не засталося адзінай інфармацыйнай лініі для ахвяраў хатняга гвалту, а таксама грамадскіх арганізацый, якія б ім дапамагалі.
У Беларусі няма закона аб супрацьдзеянні хатняму гвалту. Адпаведны дакумент распрацоўваўся некалькі разоў. У кастрычніку 2018 года чарговы варыянт рэзка раскрытыкаваў Лукашэнку, назваўшы яго “бздурай, узятай найперш з Захаду”.