Ціханоўская выказала спачуванні блізкім загінулых ваяроў палка Каліноўскага

8 красавіка, Позірк. Дэмакратычны лідар Святлана Ціханоўская “бязмерна засмучаная стратай двух адважных салдат з беларускага палка імя Кастуся Каліноўскага, якія доблесна змагаліся за свабоду як Украіны, так і Беларусі”.

“Мае глыбокія спачуванні іх блізкім і сябрам. Іх гераізм ніколі не будзе забыты”, — напісала палітык на сваёй старонцы ў сацыяльнай сетцы Х.

Пра гібель двух байцоў батальёна “Волат” пры выкананні баявога задання ва Украіне прэс-служба палка Каліноўскага паведаміла напярэдадні. Дакладная дата іх смерці не называецца, навіна з’явілася ў відэасправаздачы, якая ахоплівае перыяд з 25 сакавіка.

“Асобы ваяроў і абставіны на гэты момант не раскрываюцца ў мэтах бяспекі”, — заявіла спікер палка. Паводле яе слоў, полк на сувязі са сваякамі і блізкімі загінулшых, адбыліся цырымоніі развітання з байцамі.

У сакавіцкай справаздачы палка з нагоды двухгоддзя стварэння гаварылася агулам пра 19 загінулых салдатах. Тады ж камандзір палка Дзяніс Прохараў паведаміў, што ў складзе палка амаль 5 тыс. чалавек.