Бізнесоўца абвінавацілі ва ўхіленні ад выплаты падаткаў за пастаўкі медабсталявання праз Балгарыю

9 красавіка, Позірк. Пракуратура Мінска ўзбудзіла крымінальную справу аб ухіленні ад выплаты падаткаў у буйным памеры паводле ч. 2 арт. 243 Крымінальнага кодэкса. Падазраваны — прадпрымальнік, прозвішча якога не паведамляецца.

Як адзначае прэс-служба Генпракуратуры, у 2021–2022 гадах ад замежнай кампаніі, зарэгістраванай грамадзянінам Беларусі ў Балгарыі, на адрас “падкантрольнай яму камерцыйнай арганізацыі, зарэгістраванай у Мінску, пастаўленыя медыцынскае абсталяванне і спадарожныя таварна-матэрыяльныя каштоўнасці”.

“Фактычна тавары прыбывалі ў Мінск непасрэдна ад заводаў-вытворцаў, а рэквізіты замежнай кампаніі выкарыстоўваліся для павелічэння кошту прадукцыі ў 2–3 разы ў параўнанні з коштам такіх жа пазіцый заводаў-вытворцаў. Названыя дзеянні пацягнулі зніжэнне падатковай базы па падатку на прыбытак у суме звыш 572,1 тыс. рублёў”, — сцвярджае ведамства.

Справу будзе расследаваць аддзел Следчага камітэта Маскоўскага раёна Мінска.

Ці затрыманы падазраваны, не паведамляецца.

Максімальнае пакаранне паводле ч. 2 артыкула 243 КК — сем гадоў пазбаўлення волі.