Беларусь трэба ўключыць у “стратэгічнае планаванне еўрапейскіх краін”, заяўляе Кавалеўскі

10 красавіка, Позірк. Беларусь неабходна ўключаць у “глабальныя і рэгіянальныя стратэгіі Еўропы”, заявіў намеснік кіраўніка Аб’яднанага пераходнага кабінета (АПК), прадстаўнік па замежных справах Валерый Кавалеўскі на сустрэчы з кіраўніком Мюнхенскай канферэнцыі па бяспецы (MSC) Крыстафам Хойсгенам.

Прэс-служба АПК 10 красавіка паведаміла, што бакі абмеркавалі “месца Беларусі ў рэгіянальным крызісе”, уплыў, які Расія чыніць на беларускую дзяржаву, а таксама “пагрозы для Беларусі і Еўропы, якія гэта нясе, і крокі па супрацьдзеянні расійскім намерам”.

На думку Кавалеўскага, роля аналітычнай супольнасці ў ацэнцы пагроз, якія нясе Расія беларускаму суверэнітэту і незалежнасці, “можа быць значнай, каб праз гэта дабіцца ўключэння Беларусі ў стратэгічнае планаванне еўрапейскіх краін”.

Палітык падкрэсліў, што MSC — “прызнаны лідар сярод аналітычных структур”, экспертыза якіх “каштоўная для абмеркавання такіх крокаў”. У дэмакратычных сіл, дадаў ён, “прасунуты ўзровень стасункаў” з MSC.

18 лютага дэмлідар Святлана Ціханоўская на панэльнай дыскусіі ў рамках MSC заявіла: “Я хачу, каб мір і людзі <…> зразумелі, што дыктатараў нельга перавыхаваць, што дыктатараў нельга ўлагодзіць… Не думайце, што вы маеце справу з нармальнымі людзьмі, з нармальнымі палітыкамі. Іх не хвалююць ні народ, ані суседзі. Іх хвалюе толькі ўлада. І я вельмі хачу, каб дэмакратычны свет паказаў зубы”.