У Брэсцкім СІЗА памёр падпалкоўнік запасу, якога абвінавачвалі ў абразе Лукашэнкі (дапоўнена)

10 красавіка, Позірк. Падпалкоўнік запасу Аляксандр Кулініч памёр 9 красавіка ў следчым ізалятары № 7 Брэста, паведамляе выданне “Люстэрка” са спасылкай на дзве не звязаныя паміж сабой крыніцы.

У заключэнні аб смерці яе прычынай названая ішэмічная хвароба сэрца.

51-гадовага Кулініча затрымалі 29 лютага ў Брэсце, абвінавацілі ў абразе Лукашэнкі (арт. 368 Крымінальнага кодэкса).

Разгляд справы быў прызначаны на 16 красавіка.

Кулініч нарадзіўся ў Маладзечне (Мінская вобласць) 11 красавіка 1972 года. Былы вайсковец, служыў у 38-й Брэсцкай асобнай дэсантна-штурмавой брыгадзе. У апошні час быў зарэгістраваны індывідуальным прадпрымальнікам, займаўся харчовымі дабаўкамі.

Паводле звестак крыніц, цела нябожчыка выдалі сваякам, пахаванне пройдзе 11 красавіка ў Маладзечне.

У 1998–2001 гадах камандзірам 38-й брыгады быў Валерый Сахашчык, які цяпер займае пасаду прадстаўніка Аб’яднанага пераходнага кабінета па абароне і нацыянальнай бяспецы.

У Беларусі ў зняволенні памерла мінімум пяць палітвязняў.

20 лютага 2024 года ў Мінскай раённай бальніцы памёр 63-гадовы журналіст і грамадскі актывіст, былы сябра Беларускай сацыял-дэмакратычнай партыі (Грамада) Ігар Леднік, які меў інваліднасць другой групы і праблемы з сэрцам. У бальніцу яго даставілі з бабруйскай калоніі № 2, дзе ён адбываў пакаранне. Да гэтага ўтрымліваўся ў магілёўскай калоніі № 15.

У студзені гэтага года памёр 50-гадовы Вадзім Храсько ў папраўчай калоніі № 3 (пасёлак Віцьба Віцебскага раёна), 21 траўня 2022 года ў шклоўскай калоніі № 17 (Магілёўская вобласць) загадкава памёр 50-гадовы актывіст і грамадскі дзеяч Вітольд Ашурак, 7 траўня 2023-га ў згаданай віцебскай калоніі — 61-гадовы блогер і актывіст з хворым сэрцам Мікалай Клімовіч, 11 ліпеня 2023-га — прывезены ў лякарню з гродзенскай турмы №1 57-гадовы мастак Алесь Пушкін, у якога дыягнаставалі прободную язву страўніка.