У Мінску аўтобус сутыкнуўся з грузавіком, паводле папярэдніх звестак, шпіталізавана 14 чалавек

16 красавіка, Позірк. Паводле папярэдніх звестак, 14 чалавек дастаўлены ў бальніцы пасля сутыкнення аўтобуса з грузавіком раніцай 16 красавіка ў Мінску, паведамляе прэс-служба Міністэрства ўнутраных спраў.

“Каля 8:10 пры руху па Смілавіцкім тракце з боку п. Сосны ў кірунку вул. Сяліцкага, паводле папярэдняй інфармацыі, маршрутны аўтобус МАЗ здзейсніў сутыкненне з грузавым аўтамабілем Volvo, які стаяў, — гаворыцца ў паведамленні. — Ва ўстановы аховы здароўя для ацэнкі стану здароўя брыгадамі хуткай дапамогі дастаўлены 14 чалавек (удакладняецца)”.

На месцы аварыі працуюць супрацоўнікі Дзяржаўтаінспекцыі, следчыя, ратавальнікі і медыкі. Высвятляюцца абставіны дарожна-транспартнага здарэння.

Міністэрства аховы здароўя са спасылкай на Цэнтр медыцынскага рэагавання паведаміла, што пацярпелых пасажыраў аўтобуса даставілі ў сем сталічных медустаноў для дыягностыкі і лячэння.

“Першачная медыцынская дапамога пацярпелым на месцы ДТЗ аказана спецыялістамі васьмі брыгад хуткай меддапамогі, — адзначае ведамства. — Паводле папярэдняй інфармацыі спецыялістаў хуткай медыцынскай дапамогі, якія працавалі на месцы здарэння, у пацярпелых дыягнаставаныя спалучаныя траўмы: чэрапна-мазгавыя траўмы, пераломы, удары, ірваныя раны, ранкі і ўдары. Усім пацыентам зараз праводзяцца ўсе неабходныя лячэбна-дыягнастычныя мерапрыемствы”.

Пра стан пацярпелых сваякі могуць дазнацца ў даведачных службах 2-й, 5-й, 6-й, 10-й бальніц, гарадской бальніцы хуткай медыцынскай дапамогі, двух рэспубліканскіх навукова-практычных цэнтраў — неўралогіі і нейрахірургіі, а таксама траўматалогіі і артапедыі.

6 красавіка ў сталіцы маршрутнае таксі сутыкнулася з прыпаркаванымі аўтамабілямі, шпіталізацыя спатрэбілася чатыром пасажырам. Раней у той жа дзень іншая маршрутка ўрэзалася ў трактар, дзевяць з дзесяці пацярпелых павезлі ў бальніцы.