Ціханоўская сустрэлася з міністрамі замежных спраў краін G7, каб “вярнуць Беларусь у міжнародны парадак дня”

18 красавіка, Позірк. “Вярнуць Беларусь у міжнародны парадак дня, каб міжнародная супольнасць адрознівала беларускі рэжым ад народа, а ізалюючы Лукашэнку не ізалявала беларусаў”, — такой была мэта сустрэч з міністрамі замежных спраў краін Вялікай сямёркі (G7) 18 красавіка на Капры, паведаміла Святлана Ціханоўская ў відэасправаздачы па выніках візіту на гэты італьянскі востраў.

“Я заклікала міністраў працягваць падтрымку нашай грамадзянскай супольнасці і медыя. Распавяла пра лёсы нашых палітвязняў, у тым ліку Машы Калеснікавай, Алеся Бяляцкага, і што такое інкамунікада (інфармацыйная блакада палітзняволеных. — “Позірк”.)”, — адзначыла Ціханоўская.

У размовах з міністрамі яна ўзняла ранейшыя тэмы: “прыцягненне рэжыму да адказнасці не толькі за вайну супраць Украіны, але і за рэпрэсіі супраць беларусаў”, “пытанне абароны нашай незалежнасці — Беларусь не павінна стаць суцяшальным прызам для Пуціна”.

Паводле слоў Ціханоўскай, з дзяржаўным сакратаром ЗША Энтані Блінкенам абмеркавана падтрымка для Украіны і Беларусі, “бо лёсы нашых краін узаемазвязаныя”. Дзяржсакратара “вельмі хвалюе лёс нашых палітвязняў, і ЗША прыкладваюць намаганні для іх вызвалення”, адзначыла дэмлідар.

З міністрам замежных справаў Германіі Аналенай Бербак гаворка ішла пра падтрымку незалежных медыя, НДА, праграмы рэабілітацыі палітвязняў. “У мінулым годзе Германія аказала вялікую падтрымку, і сотні рэпрэсаваных атрымалі медычную і псіхалагічную дапамогу. Ужо больш за 1.300 палітвязняў адбылі свае тэрміны і патрабуюць дапамогі, як і сем’і ўсіх тых, хто застаецца ў турмах”, — падкрэсліла Ціханоўская.

З міністрам замежных спраў Францыі Стэфанам Сэжурнэ абмеркаваны яе магчымы візіт у Францыю, супраца з дэмакратычнымі сіламі. “Міністра цікавала ваенна-палітычная сітуацыя ўнутры краіны, у прыватнасці мілітарызацыя беларускай эканомікі і як рэжым працягвае зарабляць на вайне”, — паведаміла Ціханоўская. Яна адзначыла, што Сэжурнэ быў адным з першых палітыкаў, з кім яна сустрэлася ў Вільнюсе падчас падзей 2020 году.

З міністрам замежных справаў Вялікабрытані Дэвідам Кэмеранам разгледжаны магчымасці правядзення стратэгічных кансультацый з Вялікабрытаніяй, як гэта ўжо зроблена з ЗША. Кэмеран “распавёў пра сваю нядаўную сустрэчу з прадстаўнікамі беларускай грамадзянскай супольнасці”.

З вярхоўным прадстаўніком ЕС па замежных справах і палітыцы бяспекі Жазэпам Барэлем абмеркавана падтрымка беларускай грамадзянскай супольнасці, праблемы беларусаў у выгнанні. “Беларусам патрэбна больш візаў, больш стыпендый, больш кантактаў з еўрапейцамі”, — падкрэсліла дэмлідар.

Сустрэча міністраў замежных спраў краін G7 традыцыйна папярэднічае саміту аб’яднання. Сёлета ён адбудзецца 13—15 чэрвеня ў італьянскім горадзе Брындзізі.

У 2024 годзе Італія старшынствуе ў G7, куды ўваходзяць таксама Вялікабрытанія, Германія, ЗША, Канада, Францыя і Японія.