Беларусь распрацоўвае зброю, заснаваную на новых фізічных прынцыпах — Генштаб
"Светлавы меч" у сусвеце паўсюдна вядомай сагі "Зорныя войны"
24 красавіка, Позірк. У Беларусі маюцца “распрацоўкі па лазернай зброі”, заявіў намеснік начальніка Генеральнага штаба па навуковай працы Віктар Тумар на выставе дасягненняў ваенна-прамысловага комплексу 24 красавіка ў Мінску.
“Мы ідзём непасрэдна да зброі, заснаванай на новых фізічных прынцыпах”, — цытуе яго прэс-служба Мінабароны.
Вайсковае камандаванне арыентуецца на тое, каб “было толькі сваё, беларускае” ўзбраенне, падкрэсліў Тумар.
“Цяпер мы з’яўляемся адным з лідараў у радыёэлектроннай барацьбе, у распрацоўцы радыёлакацыйных сістэм выяўлення розных аб’ектаў”, — сцвярджае намеснік начальніка Генштаба.
У чэрвені 2023 года паведамлялася, што мінскае прадпрыемства “НТЦ “ЛЭМТ” асвоіла выпуск баявога лазера, які здольны збіваць беспілотнікі на адлегласці ад 400 метраў да 6 кіламетраў.
Адзначалася, што акрамя прапальвання пластыкавага корпуса, ён здольны знішчаць матэрыялы — ад алюмінія да цэглы.
5 ліпеня таго ж года Мінабароны паведамляла аб правядзенні паказальных комплексных тактыка-спецыяльных заняткаў з адным з падраздзяленняў 38-й дэсантна-штурмавой брыгады. Падчас іх вайскоўцы правялі “трэніроўку ў дзеянні з выкарыстаннем лазернай зброі ва ўмовах, максімальна набліжаных да баявых”.
Сёлета ў лютым старшыня Дзяржкамваенпрама Дзмітрый Пантус заявіў дзяржСМІ, што спецыялісты вельмі шмат увагі надаюць ракетабудаванню і барацьбе з БПЛА.
“Гэта сёння ключавое. Тут адзначу, што ў частцы паражэння БПЛА, што нізка лётаюць, мы прынялі для сябе вельмі сур’ёзнае рашэнне. Цяпер працуем над стварэннем уніфікаванага комплексу на новых прынцыпах паражэння. Гэта ўжо будзе не стралковая зброя, а з выкарыстаннем у тым ліку і лазера”, — сказаў ён.
