Літва запатрабавала ад Мінска “неадкладна абвергнуць дэзінфармацыю” Церцеля
26 красавіка, Позірк. Часоваму паверанаму ў справах Беларусі Яраславу Хмылю ўручная дыпламатычная нота, паведаміла 26 красавіка Міністэрства замежных спраў Літвы.
У ноце, як адзначаецца, выказаны “рашучы пратэст у сувязі з заявамі, зробленымі 25 красавіка 2024 года кіраўніком КДБ Беларусі Іванам Церцелем аб нібыта пагрозах Беларусі з боку Літвы, у тым ліку аб нібыта ўдарах вайсковых дронаў <…> па аб’ектах на тэрыторыі Беларусі і іншых падобных, неабгрунтаваных інсінуацыях”.
“Падобныя заявы прадстаўнікоў беларускага рэжыму не маюць нічога агульнага з рэальнасцю”, — падкрэслілі ў МЗС Літвы.
Ведамства запатрабавала ад Беларусі “неадкладна абвергнуць дэзінфармацыю” і заявіла, што “Літва прыме ўсе магчымыя меры для забеспячэння сваёй бяспекі, суверэнітэту і тэрытарыяльнай цэласнасці”.
На пасяджэнні Усебеларускага народнага сходу 25 красавіка Церцель заявіў, што КДБ прадухіліў удары з тэрыторыі Літвы баявымі дронамі па аб’ектах у Мінску і ваколіцах. Згадаўшы нейкія “вострыя чэкісцкія мерапрыемствы” для прадухілення ўдараў, ён сказаў, што “праца па гэтым напрамку працягваецца”, аднак “дэталёвую інфармацыю агучыць грамадскасці пакуль не ўяўляецца магчымым”. Ніякіх пацверджанняў сваім словам ён не прадставіў.
Акрамя таго, паводле слоў Церцеля, “у непасрэдным кантакце з літоўскім парамілітарным фарміраваннем “Клуб стралкоў” будуюцца планы па заходзе для здзяйснення тэрактаў на тэрыторыю прылеглых да Літвы Ашмянскага, Смаргонскага і Браслаўскага раёнаў, перакідання і арганізацыі ў Рэспубліцы Беларусь схованак са зброяй, выбуховымі рэчывамі, сродкамі паражэння”.
У той жа дзень прэс-сакратар Узброеных сіл Літвы Гінтаўтас Цюніс назваў словы Церцеля “абсалютнай дэзінфармацыяй”, дадаўшы, што Літва “не прадпрымае ніякіх варожых дзеянняў супраць іншых дзяржаў”.
