Самалёты расійскай кампаніі Red Wings 1 чэрвеня пачнуць лятаць паміж Ульянаўскам і Мінскам

4 траўня, Позірк. Самалёты расійскай кампаніі Red Wings 1 чэрвеня пачнуць лятаць паміж Ульянаўскам (РФ) і Мінскам, вынікае з інфармацыі авіяперавозчыка.

Адлегласць паміж цэнтрам Ульянаўскай вобласці Расіі і беларускай сталіцай складае каля 1,4 тыс. км. Плануецца, што з Ульянаўска борт будзе вылятаць кожную суботу ў 19:50 па часе пункта адпраўлення (прыбыццё ў Мінск — 21:20 па часе пункта прызначэння); назад — па нядзелях у 14:15 (прыбыццё — 17:35). Час у дарозе — 2,5 гадзіны.

Ульянаўск стане пятым расійскім горадам, адкуль самалёты Red Wings будуць лятаць у Мінск. Раней былі арганізаваны рэйсы з Архангельска, Уфы, Чалябінска; 1 чэрвеня адновяцца палёты з Самары.

Пра магчымасць адкрыцця ў 2024 годзе рэйса Ульянаўск — Мінск 29 лютага паведаміў амбасадар Беларусі ў РФ Дзмітрый Круты. На той момант, паводле слоў дыпламата, ужо была падабраная авіякампанія і абмеркаваная схема фінансавання маршруту.

5 сакавіка губернатар Ульянаўскай вобласці Аляксей Рускіх заявіў, што адкрыццё адпаведнага рэйса падтрымлівае ўрад Беларусі і Аляксандр Лукашэнка. Тады ж ён сказаў, што вядуцца перамовы пра субсідаванне адкрыцця гэтага рэйса з бюджэту Саюзнай дзяржавы.

Створаная ў 1999 годзе авіякампанія Red Wings уваходзіць у дзясятку найбуйнейшых расійскіх авіяперавозчыкаў. Яе спецыялізацыя — рэгулярныя і чартарныя рэйсы, пакрывае больш за 100 расійскіх і міжнародных маршрутаў.

Базавыя аэрапорты — Жукоўскі, Дамадзедава, Кальцова (Екацярынбург) і аэрапорт імя Ігара Курчатава ў Чалябінску.

3 красавіка самалёты “Белавія” пачалі лятаць паміж Брэстам і Масквой, 22 сакавіка — паміж Гомелем і Санкт-Пецярбургам, 25 красавіка — паміж Мінскам і Махачкалой, 28 траўня плануецца аднавіць прамыя рэйсы паміж беларускай сталіцай і Мурманскам (выконваліся ў траўні — кастрычніку 2023 года, перапыненыя на зімовы перыяд).

Федэральнае агенцтва паветранага транспарту (Расавіяцыя) вывучае цікавасць расійскіх авіякампаній па арганізацыі рэйсаў у Гродна.

Паводле інфармацыі Міністэрства эканамічнага развіцця РФ, больш за 30 расійскіх рэгіёнаў зацікаўлена ў авіязносінах з Беларуссю.