Ціханоўская: Сотні тысяч беларусаў не могуць вярнуцца дадому і абняць родных на Вялікдзень

5 траўня, Позірк. Вялікдзень — гэта свята, якое прынята адзначаць у коле сям’і, аднак “многія беларусы не могуць быць побач з роднымі ў гэты дзень”, заявіла 5 траўня дэмакратычны лідар Святлана Ціханоўская.

“[У гэты дзень] мы чакаем сваякоў у госці, гуляем у біткі, едзем у свае вёскі да бабуль і дзядуль — есці самыя смачныя ва ўсім свеце паскі”, — сказала палітык у відэа, апублікаваным у яе тэлеграм-канале.

У гэты ж час, адзначыла яна, “нявінныя людзі сядзяць у турмах, падвяргаюцца пераследам і катаванням”, “сотні тысяч беларусаў вымушаныя жыць у розных краінах — без магчымасці вярнуцца дадому, каб абняць родных на Вялікдзень”.

“Мы з вамі праходзім праз час выпрабаванняў. Давайце не забываць, што Ісус Хрыстос таксама пакутаваў за праўду. <…>. Наша сіла — у святле і веры, якую мы нясем праз цемру нягледзячы ні на што. У падтрымцы, якую даем тым, каму цяжка. Наша сіла — дабрыня і спагадлівасць, і ніхто і ніколі не зможа іх у нас адабраць”, — падкрэсліла Ціханоўская.

Праваслаўныя вернікі 5 мая адзначаюць найстаражытнейшы і найважнейшы хрысціянскае свята — Уваскрасенне Хрыстова, або Вялікдзень.

Праваслаўе ў Беларусі лічыцца дамінуючай хрысціянскай канфесіяй. Руская праваслаўная царква лічыць беларускую зямлю сваёй кананічнай тэрыторыяй. Беларускі экзархат РПЦ ацэньвае колькасць вернікаў у чатыры мільёны. Праваслаўная царква ў Беларусі налічвае 1.737 прыходаў у 15 епархіях, адкрыта 1.878 храмаў, на этапе будаўніцтва — 147.