Ціханоўская прадставіла тры магчымыя сцэнарыі перамен у Беларусі

6 траўня, Позірк. Тры магчымыя сцэнарыі перамен у Беларусі прадставіла дэмакратычны лідар Святлана Ціханоўская 6 траўня ў Каўнасе, выступаючы з лекцыяй пра рэгіянальную стабільнасць і бяспеку ва Універсітэце Вітаўта Вялікага.

Палітык адразу абмовілася, што “сёння складана прадказаць, як будзе развівацца сітуацыя”.

Разам з тым, паводле першага сцэнарыю, які прадугледжвае перамогу Украіны ў развязанай супраць яе Расіяй вайне, “Беларусь атрымлівае яшчэ адзін гістарычны шанец”.

“Чым слабей [прэзідэнт РФ Уладзімір] Пуцін, тым слабей [Аляксандр] Лукашэнка, — канстатавала яна. — Без падтрымкі Расіі рэжым Лукашэнкі не зможа ўтрымаць уладу, што адкрывае для нас акно магчымасцяў. Таму дапамога Украіне для перамогі ў вайне — наш нацыянальны інтарэс”.

Другі сцэнарый прадугледжвае “кампраміс або здзелку з Пуціным, якая замарозіць канфлікт”, і такога развіцця падзей, паводле слоў Ціханоўскай “пажадана пазбегнуць”.

“У такой сітуацыі маецца рызыка, што ў Беларусі захаваецца статус-кво, і Беларусь застанецца пад кантролем Расіі, — папярэдзіла палітык. — У абодвух дыктатараў з’явіцца час, каб умацаваць сваю ўладу і падрыхтавацца да новага нападу. Такі сцэнарый небяспечны не толькі для беларускай незалежнасці, але і для міру ў рэгіёне”.

Трэці сцэнарый прадугледжвае наступленне перамен у Беларусі да перамогі Украіны. Яна падкрэсліла, што “рэжым Лукашэнкі значна менш стабільны, чым здаецца”.

“Мы не ведаем, што можа паслужыць штуршком: эканамічны крызіс, незадаволенасць насельніцтва ці раскол эліт, — заявіла яна. — Нават адсутнасць дыктатара на працягу некаторага часу стварае вакуум улады і паралізуе сістэму. Такія змены могуць стаць пераломным момантам”.

“Ва ўсіх трох сцэнарыях існуе мноства пераменных. Мы не ведаем, як і калі адбудуцца змены. Але мы павінны быць гатовыя скарыстаць магчымасць, калі яна з’явіцца”, — падкрэсліла Ціханоўская.

Падрабязнасці даступныя падпісчыкам “Позірк+”