Касманаўтка Васілеўская прынесла клятву вернасці дзяржсімвалам
12 траўня, Позірк. Касманаўтка Марына Васілеўская прынесла клятву вернасці дзяржаўным сімвалам, паведамляе прэс-служба Аляксандра Лукашэнкі.
Гэта адбылося 12 траўня на плошчы Дзяржаўнага сцяга ў Мінску падчас цырымоніі ўшанавання дзяржсімвалаў з нагоды Дня дзяржаўнага сцяга, дзяржаўнага герба і дзяржаўнага гімна.
Адзначаецца, што клятву вернасці дзяржсімвалам прынеслі таксама “сямёра хлопцаў і дзяўчат — прадстаўнікі ад кожнай з абласцей і Мінска”.
“Ва ўрачыстай абстаноўцы” Васілеўская перадала Лукашэнку “дзяржаўны сцяг — той самы, які ў 2024 годзе пабываў на МКС, замацаваўшы статус Беларусі як касмічнай дзяржавы”, гаворыцца ў паведамленні.
19 сакавіка Лукашэнка падпісаў указ “Аб статусе беларускага касманаўта”, які прадугледжвае шэраг ільгот, прэферэнцый і абавязкаў.
Як паведамляла яго прэс-служба, дакумент прыняты “ў мэтах прызнання заслуг касманаўта перад радзімай”, а таксама “вызначэння прававога становішча касманаўтаў і прыраўнаваных да іх асоб з улікам рэалізацыі першага ў суверэннай гісторыі Беларусі праекта па касмічным палёце”.
Сярод ільгот і прэферэнцый — захаванне займаемай пасады, медыцынскае абслугоўванне ў Рэспубліканскім клінічным медыцынскім цэнтры, пенсійнае забеспячэнне, дзяржаўная падтрымка пры будаўніцтве жылля.
Таксама ўказам вызначана, што “касманаўт павінен адпавядаць свайму высокаму званню, валодаць цвёрдай грамадзянскай пазіцыяй, прымаць актыўны ўдзел у грамадска-палітычным жыцці краіны, годна прадстаўляць Рэспубліку Беларусь на міжнароднай арэне”.
Устаноўлена, што статус касманаўта прысвойваецца грамадзяніну Беларусі, які здзейсніў касмічны палёт, а таксама яго дублёру.
11 красавіка Лукашэнка прысвоіў Васілеўскай званне “Герой Беларусі”.
Васілеўская адправілася на Міжнародную касмічную станцыю 23 сакавіка — разам з камандзірам экіпажа Алегам Навіцкім (РФ, ураджэнец Беларусі) і астранаўткай НАСА Трэйсі Дайсан (ЗША).
Васілеўская і Навіцкі прабылі на арбіце 14 сутак (з іх 12 на Міжнароднай касмічнай станцыі) і вярнуліся на зямлю 6 красавіка.
Бортправадніца авіякампаніі “Белавія” Васілеўская была прызначаная членам экспедыцыі наведвання касмічнай станцыі 29 траўня 2023 года. Яе дублёрам стала дзіцячы хірург Анастасія Лянкова. Усяго ад Беларусі на палёт у космас прэтэндавала шэсць жанчын.
Місія касманаўткі Васілеўскай толькі пачынаецца, заяўляе Лукашэнка
11 красавіка, Позірк. Місія першай касманаўткі суверэннай Беларусі Марыны Васілеўскай "толькі пачынаецца", заявіў 11 красавіка Аляксандр Лукашэнка на ўрачыстай цырымоніі, прысвечанай палёту бортправадніцы "Белавія" на МКС. "Я ведаю, што такое быць першым, — цытуе Лукашэнку яго прэс-служба. — Момант раптоўнай …
