Польшча пачала будаваць электронны бар’ер на дзвюх рэках ля беларускай мяжы
17 траўня, Позірк. Польшча пачала будаўніцтва электроннага бар’ера на рэках Свіслач і Істачанка ў Падляскім ваяводстве на мяжы з Беларуссю, паведамляе RMF 24.
Праект накіраваны на рэалізацыю далейшых дзеянняў Варшавы па ўмацаванні ўсходняй мяжы “ў сувязі з міграцыйным крызісам, арганізаваным рэжымам Аляксандра Лукашэнкі”, адзначае выданне.
Падкрэсліваецца, што даўжыня бар’ера складзе 47 км, уздоўж яго будуць усталяваныя электронныя прылады, якія “дапамогуць адсочваць незаконныя ўварванні з Беларусі”.
Прэм’ер-міністр Польшчы Дональд Туск, наведваючы вайсковую аператыўную групоўку Падляшша ў вёсцы Каракулі (Падляскае ваяводства) і пляцоўку памежнікаў у вёсцы Крынкі (менш чым за кіламетр ад мяжы з Бераставіцкім раёнам Гродзенскай вобласці) заявіў, што Варшава працягне ўмацаванне мяжы з Беларуссю.
Паводле даных інспекцыі забеспячэння Узброеных сіл Польшчы, выдаткі на забеспячэнне бяспекі на польска-беларускай мяжы ў 2021–2023 гадах склалі амаль 1,5 млрд злотых (каля 375 млн долараў па бягучым курсе), у 2024 годзе яны складуць 850 млн злотых. Крыніцай фінансавання з’яўляецца бюджэт Міністэрства нацыянальнай абароны Польшчы.
Міграцыйны крызіс на мяжы Беларусі і краін ЕС працягваецца з вясны 2021 года.
Уздоўж усёй сухапутнай мяжы з Беларуссю ў Польшчы ўзведзеная загарода.
Гл. таксама:
