Беларусь наведвае міністр нацыянальнай абароны Экватарыяльнай Гвінеі

22 траўня, Позірк. У Мінск прыбыў міністр нацыянальнай абароны Экватарыяльнай Гвінеі Віктарыяна Бібанга Нсуэ Акома, паведаміў 21 траўня на сваёй старонцы ў сацсетцы Х памочнік кіраўніка Мінабароны Беларусі — начальнік дэпартамента міжнароднага ваеннага супрацоўніцтва (МВС) Валерый Равенка.

Праграма афіцыйнага візіту прадстаўніка гэтай краіны не прыводзіцца.

На пачатку сакавіка Равенка паведаміў, што беларуская дэлегацыя падчас візіту ў Экватарыяльную Гвінею вызначыла з прымаючым бокам “кірункі супрацоўніцтва” і ўзгадніла дакументы “да запланаваных мерапрыемстваў высокага ўзроўню”. Падрабязнасцяў пра дасягнутыя дамоўленасці ён тады не прывёў.

Тады ж Равенка заявіў, што беларускія вайскоўцы сустрэліся з Акома.

20 студзеня кіраўнік дэпартамента МВС паведаміў пра перамовы з намеснікам міністра абароны Экватарыяльнай Гвінеі Энгона Нчама Кандзіда Нкога, якія адбыліся “ў рамках развіцця стасункаў з краінамі Афрыкі”. Тады было заяўлена, што бакі абмеркавалі “інтэнсіфікацыю і перавод стасункаў на планавую аснову”.