Выдаткі сыходзячага складу КР за 17 месяцаў перавысілі 65 тыс. еўра — справаздача
22 траўня, Позірк. За перыяд з лютага 2023-га па чэрвень 2024 года агульныя выдаткі на аперацыйную дзейнасць Каардынацыйнай рады (КР) склалі 65.612 еўра, гаворыцца ў справаздачы палітычнай структуры.
Адзначаецца, што КР не зарэгістраваная ў якасці асобнай юрыдычнай асобы, таму фінансаванне ажыццяўлялася за кошт міжнародных арганізацый па падтрымцы грамадзянская супольнасці.
Сярэдняя колькасць ставак на паўнавартасную занятасць у 2023 годзе склала 2,7, у 2024-м — 3,5. Сярэдняя кампенсацыя (аплата працы) за паўнавартасную занятасць у 2023-м склала 1.150 еўра ў месяц (да выплаты падаткаў), у 2024-м — 1.295 еўра.
“Кіраўніцтва сакратарыята працавала на валанцёрскіх умовах і не атрымлівала кампенсацыі за сваю дзейнасць у КР”, — адзначаецца ў справаздачы.
КР правяла слуханні з прадстаўнікамі Аб’яднанага пераходнага кабінета ў жніўні 2023 года, па пытаннях вызвалення палітвязняў — у снежні 2023-га, таксама ўдзельнічала ў стратэгічным дыялогу з ЗША ў снежні 2023 года.
Акрамя гэтага, вынікае з дакументу, працягвалася праца кантактнай групы Беларусь — ЕС, накіраваная на “вырашэнне задач па ўсіх спектрах еўрапейска-беларускіх адносін”.
У лістападзе 2023 года адбыўся беларуска-ўкраінскі форум імя Астрожскіх і канферэнцыя палка імя Кастуся Каліноўскага “Шлях да волі” ў Кіеве, у гэтых мерапрыемствах таксама бралі ўдзел прадстаўнікі КР.
Рада ўдзельнічала ў зборы на FPV-дроны для палкавога БПЛА-падраздзялення імя Мікіты Крыўцова, гаворыцца ў справаздачы. У студзені гэтага года праводзіліся кансультацыі па выяўленні патрэб Беларусі ў знешняй дапамозе.
Падкрэсліваецца, што цяпер сыходзячы склад КР рыхтуецца да выбараў у раду трэцяга склікання. Выбары пройдуць 25–27 траўня 2024 года.
