22 траўня, Позірк. Грамадзянін Беларусі прыгавораны да 15 гадоў пазбаўлення волі за дзеянні “па заданні расійскай ваеннай разведкі”, паведамляе Служба бяспекі Украіны.
Адзначаецца, што мужчына прыбыў ва Украіну для “карэкціроўкі ўдараў па энергетычнай інфраструктуры”. Яго затрымалі ў студзені 2024 года пры спробе “замацаваць GPS-трэкеры на апоры ліній электраперадач, якія сілкуюць Кіеўскую агламерацыю”.
Паводле даных следства, у 2014–2017 гадах затрыманы ў складзе “тэрарыстычных груповак “лнр” і “днр” удзельнічаў у баявых дзеяннях на ўсходзе Украіны. У 2022-м, пасля пачатку поўнамаштабнай вайны, мужчына ўступіў у расійскую прыватную вайсковую кампанію “Вагнер”, у шэрагах якой “штурмаваў Бахмут і бліжэйшыя пасёлкі”.
“Пасля ён вярнуўся ў Беларусь, дзе атрымаў заданне ад свайго куратара па падрыхтоўцы дыверсій на памежнай тэрыторыі Украіны”, — сцвярджае СБУ.
Судом беларус прызнаны вінаватым паводле арт. 113 (дыверсія) і арт. 2583 (удзел у тэрарыстычнай групе або тэрарыстычнай арганізацыі) Крымінальнага кодэкса Украіны.
