Беларусі і РФ трэба хутка завяршыць фармаванне адзінай прампалітыкі, заяўляе Лукашэнка

24 траўня, Позірк. Пра неабходнасць аператыўна завяршыць фармаванне адзінай прамысловай палітыкі Саюзнай дзяржавы, ад якой “выйграюць абодва бакі”, заявіў Аляксандр Лукашэнка 24 тразня ў Мінску на сустрэчы з прэзідэнтам Расіі Уладзімірам Пуціным у пашыраным складзе.

Паводле слоў Лукашэнкі, якія прыводзіць яго прэс-служба, Беларусь і РФ плануюць і ў далейшым рэалізоўваць сумесныя праекты па імпартазамяшчэнні ў мікраэлектроніцы, машынабудаванні, станкабудаванні, ваенна-тэхнічнай сферы. 

“Інакш кажучы, у кірунках, якія забяспечваюць дасягненне мэт тэхналагічнага суверэнітэту і эканамічнай бяспекі нашых дзяржаў”, — сказаў ён. Урады дзвюх краін, паводле слоў Лукашэнкі, павінны рэалізаваць прынятыя ім з Пуцінын рашэнні “ў сціслыя тэрміны”.

Неабходна, лічыць ён, зрабіць захады па “падвышэнні загрузкі” беларускіх і расійскіх аэрапортаў. Акрамя таго, Беларусь, паводле яго слоў, зацікаўлена ў шчыльнай працы з расійскімі дзяржаўнымі карпарацыямі ў пытанні дзяржзакупак. 

Лукашэнка заявіў, што неабходна канчаткова ўзгадніць умовы паставак расійскіх нафты і газу ў Беларусь. “Мы абмяркоўваем гэта не першы год, і сёння Уладзімір Уладзіміравіч прыняў адпаведнае рашэнне. Думаю, урады ў найбліжэйшыя дні ў гэтым рэчышчы дапрацуюць гэтыя пагадненні. Мы дэталёва разабралі ўсе нюансы”, — адзначыў Лукашэнка, не ўдаючыся ў падрабязнасці.

У гэты ж дзень расійскі віцэ-прэм’ер Аляксандр Новак заявіў беларускаму дзяржаўнаму інфармагенцтву БелТА, што зараз РФ пастаўляе ў Беларусь нафту па “абсалютна рынкавых” цэнах. “Па іх ідзе пастаўка ад расійскіх прадпрыемстваў беларускім пакупнікам. Калі маецца дысконт на расійскую нафту, значыць, таксама дысконтам пастаўляецца і заводам”, — сказаў ён.

Расійскі чыноўнік заявіў пра гэта да пачатку перамоў Лукашэнкі і Пуціна. Новак дапусціў, што пытанне прэферэнцый для Мінска можа быць абмеркаванае падчас іх сустрэчы. “У любым выпадку гаворка ідзе не пра тое, што кампаніі павінны прадаваць ніжэй рынкавай цаны, а калі нейкія могуць быць прэферэнцыі, то гэта ўжо міждзяржаўны ўзровень”, — заявіў віцэ-прэм’ер РФ.

29 студзеня ў Санкт-Пецярбургу на пасяджэнні Вышэйшага дзяржсавета (ВДС) СД Аляксандр Лукашэнка заявіў, што Беларусь і Расія “пакуль цалкам не вызначыліся па самых галоўных пытаннях — гэта тычыцца стварэння адзіных рынкаў газу, нафты і нафтапрадуктаў”, і прызнаўся, што рэгулярна абмяркоўвае гэтыя пытанні з Пуціным.

Цана на газ для Беларусі ў 2024–2025 гадах складае 128,5 долара за тысячу кубаметраў.