Беларусь і Манголія заключылі дагавор аб дружалюбных стасунках

3 чэрвеня, Позірк. Беларусь і Манголія 3 чэрвеня заключылі дагавор аб дружалюбных стасунках і супрацы.

Адпаведны дакумент у рамках перамоў ва Улан-Батары падпісалі мангольскі прэзідэнт Ухнаагійн Хурэлсух і Аляксандр Лукашэнка, які наведвае гэтую дзяржаву ў Паўночна-Усходняй Азіі 1–4 чэрвеня.

“Аснову нашых стасункаў, безумоўна, стварылі нашыя вельмі блізкія і цёплыя стасункі ў часы існавання Савецкага Саюза, — цытуе беларускага палітыка яго прэс-служба. — Мы разам з вамі ваявалі супраць захопнікаў і акупантаў, разам з вамі аднаўлялі наша жыццё. І мы сёння прыехалі як пасланцы добрай волі, як вашыя сябры, каб паглыбіць і пашырыць нашыя стасункі”.

У той жа час, паводле яго слоў, гандлёва-эканамічныя стасункі Беларусі і Манголіі “жадаюць, мякка кажучы, быць значна лепш”.

На перагаворах у пашыраным складзе палітыкі абмеркавалі перспектыўныя кірункі супрацы для “максімальна поўнага раскрыцця патэнцыялу” беларуска-мангольскіх стасункаў. У першую чаргу гаворка ішла пра “магчымасці пашырэння ўзаемадзеяння” ў гандлёва-эканамічнай сферы, пастаўках на мангольскі рынак харчовай і прамысловай прадукцыі беларускіх прадпрыемстваў, сумеснай працы па лініі аграпрамысловага комплексу.

Лукашэнка прапанаваў “вызначыць тры-чатыры праекты”, рэалізацыя якіх пакажа, што Беларусь можа “супрацоўнічаць з манголамі не горш”, чым тыя супрацоўнічаюць “з гэтымі вялікімі імперыямі (верагодна, гаворка пра Расію і Кітай, паміж якімі знаходзіцца Манголія. — “Позірк”.)”.

Ён прапанаваў суразмоўцу даслаць у Беларусь мангольскіх адмыслоўцаў, каб тыя ўбачылі, як развіваецца беларуская дзяржава, выбралі для сябе “тое, што спатрэбіцца для Манголіі”, а таксама запрасіў Ухнаагійн Хурэлсуха і яго калег наведаць у Беларусь.

Нагадаўшы, што наведваў Манголію ў 1992 годзе ў якасці дэпутата, Лукашэнка заявіў, што “наогул узрушаны” зменамі, якія адбыліся: “Новыя будынкі, збудаванні. Прагрэс бачны на кожным кроку, пачынаючы з аэрапорта. Я вас віншую з гэтым вялізным прагрэсам”.

Знешнюю палітыку, якую праводзіць Манголія, ён назваў “адзіна правільным шляхам”. “Заціснутыя паміж дзвюма імперыямі, найвялікшымі дзяржавамі, вы вельмі тонка, акуратна праводзіце знешнюю палітыку, балансуючы паміж гэтымі сіламі, — сказаў Лукашэнка. — Ведаю, як няпроста вам утрымацца на плаву і павышаць дабрабыт вашага народа. <…> Таму што свет сёння ашалеў. Паважаюць толькі сілу. І каб існаваць у гэтым шалёным свеце, трэба быць моцным”.

“Я ад усёй душы зычу вам быць моцнымі, каб выжыць у гэтым свеце і зрабіць мангольскі народ заслужана багатым і вялікім. Вялікі Чынгісхан, перад якім вы схіляецеся, і заслужана, таму што ў вас вялікая гісторыя, заўсёды вучыў: каб нечага дасягнуць, кожнаму трэба на сваім месцы рабіць сваю справу. А ўлада павінна быць цвёрдай, цвёрдай, як кулак. Растапыранымі пальцамі ўладу ніхто не трымае”, — дадаў ён.

Напярэдадні візіту Лукашэнкі экс-прэзідэнт Манголіі Цахіягійн Элбэгдорж (2009–2017) заклікаў цяперашнія ўлады дзяржавы арыштаваць візіцёра, які “здзейсніў злачынствы супраць чалавечнасці”. Гэта, на яго думку, палепшыла б імідж краіны.

Дэмакратычны лідар Святлана Ціханоўская падзякавала мангольскаму палітыцы за “рашучы заклік прыцягнуць беларускага дыктатара да адказнасці”, заявіла, што “Лукашэнка павінен прадстаць перад міжнародным трыбуналам”.