Да 2035 года ўлады маюць намер павялічыць выкарыстанне камунальных адкідаў да 90%

6 чэрвеня, Позірк. Павелічэнне ўзроўню выкарыстання цвёрдых камунальных адкідаў да 90% ад іх агульнага аб’ёму ў 2035 годзе закладзена Нацыянальнай стратэгіяй развіцця эканомікі замкнутага цыкла (цыркулярнай эканомікі).

Дакумент зацверджаны пастановай урада ад 29 траўня № 393 і апублікаваны на Нацыянальным прававым інтэрнет-партале.

Указваецца, што ў 2021 годзе было паўторна выкарыстана 31,1% адкідаў.

Доля вытворчасці (здабычы) першаснай энергіі з аднаўляльных крыніц энергіі (АКЭ) да аб’ёму валавога спажывання паліўна-энергетычных рэсурсаў павінна вырасці з 7,9% да 9%.

Таксама прадугледжана зніжэнне энергаёмістасці ВУП (у цэнах 2005 года) з 388,1 кг умоўнага паліва на мільён рублёў у 2021 годзе да 268 кг у.т./млн рублёў.

Узровень выкарыстання цвёрдых камунальных адходаў па выніках 2022 года склаў 32%, паведаміў у сакавіку мінулага года намеснік дырэктара ДУ “Аператар другасных матэрыяльных рэсурсаў” Арцём Шкрыль.

Па выніках пазамінулага года доля АКЭ ў паліўна-энергетычным балансе Беларусі дасягнула 8,1%, паведамляла раней Мінэнерга.

Магутнасць аб’ектаў аднаўляльных крыніц энергіі ў Беларусі за дзевяць гадоў вырасла ў пяць разоў — са 120 МВт да 608 МВт да канца 2022 года. Аб’ём вытворчасці электраэнергіі АКЭ — з 274 да 1.275 млн кВт⋅ч, сведчаць даныя ДВА “Белэнерга”.