Эстонія можа абмежаваць беларусаў і расіян у праве купляць нерухомасць

6 чэрвеня, Позірк. Урад Эстоніі разгледзеў пытанне пра абмежаванне куплі нерухомасці грамадзянамі Беларусі і Расіі, заявіў міністр унутраных спраў гэтай балтыйскай краіны Лаўры Ляэнэметс на прэс-канферэнцыі 6 чэрвеня па выніках пасяджэння Кабінета міністраў.

“Маецца рызыка выкарыстання нерухомасці для выведкі, сабатажу або варожых дзеянняў супраць [эстонскай] дзяржавы”, — сказаў чыноўнік.

У якасці прыкладу ён прывёў сітуацыю, калі “ў Фінляндыі адзін з [расійскіх] алігархаў набыў некалькі астравоў”, размешчаных блізка да стратэгічных аб’ектаў, “і пабудаваў <…> збудаванні, якія пры неабходнасці могуць забяспечыць пасадку верталётаў”.

Паводле слоў кіраўніка МУС, пытанне пра абмежаванне магчымасці набыцця нерухомасці з’яўляецца юрыдычна складаным, таму ўрад мае намер працягнуць яго абмяркоўваць.

4 красавіка 2023 года Сейм Літвы прыняў закон аб абмежавальных мерах у дачыненні да грамадзян Беларусі і Расіі ў сувязі з ваеннай агрэсіяй супраць Украіны. Сярод іншага расійскія грамадзяне і кампаніі былі пазбаўленыя права набываць нерухомасць у гэтай балтыйскай краіне. Беларусаў абмежаванне не закранула.