МАРГ зноў заявіў пра неабходнасць паправак у заканадаўства, якія тычацца анлайн-гандлю

7 чэрвеня, Позірк. Аб неабходнасці заканадаўча ўрэгуляваць узаемаадносіны бакоў у сферы анлайн-гандлю, заявіў на відэаканферэнцыі ў рамках XXVII Пецярбургскага міжнароднага эканамічнага форуму кіраўнік Міністэрства антыманапольнага рэгулявання і гандлю (МАРГ) Аляксей Багданаў.

“Электронны гандаль з кожным днём усё больш урастае ў рэальную эканоміку, колькасць пакупнікоў на маркетплэйсах, а следам і інтэрнэт-прадаўцоў нязменна расце”, — цытуе міністра прэс-служба ведамства.

Паводле слоў Багданава, адпаведныя папраўкі ў заканадаўства неабходныя для “больш эфектыўных умоў у сферы электроннага гандлю, развіцця канкурэнцыі і абароны правоў спажыўцоў”.

МАРГ анансаваў змены ў працы маркетплэйсаў у сакавіку гэтага года. Адпаведныя папраўкі ведамства распрацоўвае ў закон “Аб абароне правоў спажыўцоў”. Чакаецца, што змены ўступяць у сілу ў канцы гэтага або пачатку наступнага года, паведаміла 14 сакавіка на прэс-канферэнцыі начальнік упраўлення абароны правоў спажыўцоў і кантролю за рэкламай МАРГ Іна Гаўрыльчык.

Паводле яе слоў, у закон будзе ўнесеная норма, якая прадаставіць права інтэрнэт-крамам атрымліваць аплату толькі ў электронным выглядзе. Цяпер, удакладніла чыноўніца, дазволеныя дзве формы разліку — наяўны і безнаяўны.

Яшчэ адно змяненне, паводле слоў прадстаўніцы ведамства, закране дзейнасць агрэгатараў інтэрнэт-крам (маркетплэйсаў), якія цяпер працуюць як інтэрнэт-крамы.

З улікам таго, што яны “не могуць несці ўсе абавязкі прадаўца”, плануецца вызначыць іх як пасярэдніка, “прапісаць адпаведныя правы і абавязкі з мэтай абароны правоў спажыўца”, сказала Гаўрыльчык. У прыватнасці, удакладніла яна, маркетплэйсы атрымаюць права скасоўваць дамову з “нядобрасумленнымі прадаўцамі”, якія парушаюць закон “Аб правах спажыўцоў”.

Калі аплачаны тавар не дастаўлены пакупніку, маркетплэйс абавяжуць кампенсаваць выдаткаваныя сродкі.