Колькасць кляшчоў у Беларусі за год вырасла ў 1,6 раза

10 чэрвеня, Позірк. Цяперашняя колькасць кляшчоў у Беларусі ў 1,6 раза перавышае паказчык за аналагічны перыяд 2023 года, паведамляе прэс-служба Міністэрства аховы здароўя са спасылкай на вынікі энтамалагічнага сачэння.

Барэліямі (бактэрыі сямейства Spirochaetaceae) было інфікавана каля 25% даследаваных у лабараторыях кляшчоў, вірусам клешчавога энцэфаліту — 0,7%.

Паводле даных ведамства, павелічэнню колькасці кляшчоў садзейнічалі ранняя вясна і цёплае надвор’е. У паўднёвай частцы краіны першыя кляшчы з’явіліся ўжо ў лютым.

За 5 першых месяцаў года праз укусы кляшчоў да медыкаў звярнулася 6,6 тыс. чалавек, у тым ліку 2,5 тыс. дзяцей, найбольш у Гродзенскай, Брэсцкай абласцях і Мінску.

Гэтыя членістаногія пераносяць клешчавы энцэфаліт і хваробу Лайма. Заразіцца вірусным клешчавым энцэфалітам можна і пасля ўжывання ў ежу сырога малака коз.

Успрымальнасць людзей да клешчавых інфекцый высокая, не залежыць ад полу і ўзросту, падкрэслівае Мінздароўя.

Часцей за ўсё кляшчы прысмоктваюцца ў лясах (44%), на дачных участках (35%), у гарадскіх парках (12%).

Пры наведванні лясных і паркавых зон рэкамендуецца пры працяглым знаходжанні ў лесе насіць адмысловае адзенне, якое засцерагае ад прысмоктвання кляшчоў, або выкарыстоўваць паўсядзённае адзенне, якое максімальна закрывае адкрытыя ўчасткі цела; выкарыстоўваць адпужвальныя сродкі (рэпеленты); праводзіць сама- і ўзаемаагляды адзення, цела праз кожную гадзіну і па выхадзе з лесу для выяўлення і зняцця кляшчоў; у ежу ўжываць толькі ўзваранае казінае малако; для памяншэння колькасці кляшчоў на тэрыторыі пражывання (дачы) выдаляць ламачча, праводзіць высечку непатрэбных хмызнякоў і скошванне травы, праводзіць дэратызацыю.

Пры выяўленні кляшча, які ўжо прысмактаўся, варта звярнуцца ў самую блізкую арганізацыю аховы здароўя або выдаліць кляшча самастойна. Пасля яго вымання варта звярнуцца ў паліклініку, амбулаторыю, ФАП. Урач пры неабходнасці прызначыць прафілактычнае лячэнне і ўсталюе медыцынскае назіранне.

У Беларусі імунізацыя супраць віруснага клешчавога энцэфаліту на бясплатнай аснове надаецца асобам, чыя прафесійная дзейнасць звязаная са знаходжаннем у лесе. Астатнія могуць зрабіць прышчэпку платна. Кошт вакцынацыі — ад 22 да 120 рублёў у залежнасці ад прэпарата, які выкарыстоўваецца.

Штогод у краіне фіксуецца каля 200 выпадкаў клешчавога энцэфаліту і звыш 2 тыс. выпадкаў лайм-барэліёзу. Кожны год па дапамогу да медыкаў наконт укусаў кляшчоў звяртаецца каля 50 тыс. чалавек.