Фігурант памежнага скандалу Смактуновіч не заўважаны ў пратэстнай актыўнасці — ByPol

12 чэрвеня, Позірк. Дэпартаваны 12 чэрвеня Польшчай грамадзянін Беларусі Дзмітрый Смактуновіч на 2021 год не быў заўважаны ў пратэстнай актыўнасці, паведамляе аб’яднанне былых сілавікоў ByPol па выніках праведзенай праверкі.

“Устаноўлена наступнае: Смактуновіч у базе [МУС] “Беспарадкі” на 2021 год не знаходзіцца, інфармацыі аб яго ўдзеле ў пратэстах не выяўлена, негатыўных каментароў у дачыненні да рэжыму Лукашэнкі не выяўлена, у сацыяльных сетках кампраметуючай інфармацыі, за якую яго могуць прыцягнуць у Беларусі да адказнасці, не выяўлена”, — заяўляе ByPol.

Павдле даных аб’яднання, раней Смактуновіч працаваў на грамадзянскай пасадзе кантралёра ў пазаведамаснай ахове.

Дзяржпагранкамітэт Беларусі 12 чэрвеня таксама паведаміў, што ў Смактуновіча “адсутнічаюць праблемы з беларускім заканадаўствам”, і раней ён “неаднаразова перасякаў беларускую мяжу”.

Пры гэтым жонка мужчыны заявіла парталу “Люстэрка”, што яе муж “катэгарычна супраць дзейнай улады, супраць вайны ва Украіне, ніколі не хаваў сваёй пазіцыі і актыўна пісаў пра гэта ва ўсіх сацсетках”.

Аб дэпартацыі 40-гадовага Смактуновіча, якога ў Беластоку спынілі паліцэйскія для праверкі дакументаў, а затым адвезлі на мяжу з Беларуссю, стала вядома раніцай 11 чэрвеня. Амаль суткі ён правёў на мосце праз Буг, не жадаючы пераходзіць на беларускі бок. Праз гэта 12 чэрвеня польскія памежнікі перакрылі ўезд у краіну. Каля 11 гадзін мужчына вырашыў пайсці ў Беларусь, пасля чаго рух быў адноўлены.

Паводле інфармацыі выдання MOST, прычынай дэпартацыі стала тое, што ў беларуса быў ануляваны літоўскі ВНЖ.

Пры гэтым памежная служба Польшчы зняпраўджвае факт дэпартацыі.

“Грамадзянін Беларусі, які хацеў перасекчы мяжу пешшу, быў адпраўлены назад, бо ў пераходзе Цярэспаль дазволена перасякаць мяжу толькі на аўтамабілях, там не прапускаюць пешаходаў. Гэты чалавек прыйшоў пешшу з тэрыторыі Беларусі, яго развярнулі яшчэ на мосце праз Буг, перад уваходам на тэрыторыю памежнага пераходу. Ён нават не паспеў дайсці да тэрміналаў і быў затрыманы на лініі дзяржаўнай мяжы. Ужо знаходзячыся на тэрыторыі Беларусі, ён выйшаў за агароджу моста і спрабаваў саскочыць у раку. Пасля перамоваў з беларускімі службамі мужчына вярнуўся на дарогу і сышоў на тэрыторыю Беларусі”, — заявіў парталу “Люстэрка” прэс-сакратар Надбужанскага аддзела памежнай службы Дарыюш Сеніцкі.

Паводле слоў жонкі Смактуновіча, у 2023 годзе яго затрымлівалі ў Польшчы за перавозку нелегальных мігрантаў. Прызнаўшы віну, ён супрацоўнічаў са следствам, дзякуючы яго дзеянням польскім праваахоўнікам удалося выйсці на іншых удзельнікаў канала нелегальнай міграцыі. Жонка мужчыны сцвярджае, што судзімасць на сёння пагашаная.

“Медыязона. Беларусь” паведаміла, што на беларускім баку Смактуновіч сеў у аўтобус да Мінска.