Ліцэй БДУ называны імем чэкіста Дзяржынскага

17 чэрвеня, Позірк. Ліцэй БДУ названы імем “выбітнага ўраджэнца беларускай зямлі Фелікса Эдмундавіча Дзяржынскага”, паведамляе тэлеграм-канал навучальнай установы са спасылкай на загад Белдзяржуніверсітэта № 408-ОД.

Міністэрству адукацыі і БДУ выказана падзяка за “падтрымку ініцыятывы калектыву ліцэя”.

З прапановай надаць ліцэю імя Дзяржынскага сёлета ў сакавіку выступіла дырэктар Таццяна Мамчыц. Адпаведны калектыўны зварот яна перадала рэктару БДУ Андрэю Каралю.

Дарадца беларускага дэмакратычнага лідара Святланы Ціханоўскай па пытаннях адукацыі і навукі Таццяна Шчытцова раскрытыкавала гэтую прапанову, назваўшы яе “ва ўсіх сэнсах надзвычайнай”.

На яе думку, ініцыятыва сведчыць пра намер уладаў “узмацняць неататалітарную ідэалогію ў адукацыі і падпарадкоўваць усе адукацыйныя інстытуты інтарэсам сек’юрызацыі”. Тым самым, падкрэсліла эксперт, “рэжым дасылае цынічна-катэгарычны мэсадж: тое, што раней асацыявалася са свабодай, зараз будзе асацыявацца з заснавальнікам УНК”.

“Пасля таго як вы падтрымаеце наданне ліцэю імя Дзяржынскага, ці будзеце вы гатовы надаць універсітэту імя Сталіна?” — завочна задала яна пытанне рэктару БДУ.

Фелікс Дзяржынскі (1877–1926) — ураджэнец Беларусі (Дзяржынава, Мінская вобласць). Заснавальнік Усерасійскай надзвычайнай камісіі, якая пасля пераўтваралася ў АДПУ, НКУС, КДБ.

Да кастрычніка 1917 года Дзяржынскага неаднаразова арыштоўвалі, агулам ён правёў 11 гадоў у турмах і на катарзе, дзе захварэў на сухоты.

Апублікаваны лісты Дзяржынскага, у якіх ён тлумачыць сваю жорсткасць у дачыненні да ворагаў рэвалюцыі, за што атрымаў мянушку Жалезны Фелікс.

Дзяржынскі прызнаваўся ў лістах жонцы, што “для многіх няма імя страшнейшага”, чым ён, называў сябе “салдатам рэвалюцыі”.

У Беларусі ёсць горад Дзяржынск, які з’яўляецца раённым цэнтрам (Мінская вобласць). У Мінску яго імем названы праспект, помнік Дзяржынскаму ў сталіцы знаходзіцца ў скверы насупраць будынка КДБ.

У Дзяржынава працуе музей-сядзіба яго сям’і.