Пракуратура Польшчы дазволіла вярнуцца да працы вайскоўцам, абвінавачаным у стральбе на мяжы з Беларуссю

19 чэрвеня, Позірк. Пракуратура Польшчы скасавала частку санкцый у дачыненні да вайскоўцаў, якіх абвінавацілі ў перавышэнні паўнамоцтваў за стральбу на мяжы з Беларуссю, паведамляе RMF FM.

Удакладняецца, што гаворка пра двух салдат, ад працы яны былі адхіленыя ў канцы сакавіка — пачатку красавіка. Яшчэ адзін вайсковец быў дапытаны па справе ў якасці сведкі.

Згодна з пастановай нагляднага ведамства, з абодвух вайскоўцаў знятая забарона на выкананне абавязкаў, аб скарачэнні на 50% заробку “таксама не можа быць гаворкі”, адзначае выданне. На думку пракуратуры, сабраныя доказы “не апраўдваюць прымяненне гэтых санкцый”.

Пракуратура прыняла рашэнне на фоне зацвярджэння ўрадам Польшчы 19 чэрвеня паправак да законаў, якія рэгулююць дзейнасць арміі, паліцыі і памежнай службы, уключаючы правілы выкарыстання зброі.

Папраўкі дазваляюць прадстаўнікам адпаведных службаў і ведамстваў прымяняць агнястрэльную зброю ў сітуацыях, “якія патрабуюць неадкладных дзеянняў”.

У пачатку чэрвеня стала вядома, што пракуратура Польшчы прад’явіла траім вайскоўцам абвінавачванні ў перавышэнні паўнамоцтваў і стварэнні пагрозы жыццю і здароўю мігрантаў праз папераджальныя стрэлы на мяжы з Беларуссю.

Паведамлялася, што ў канцы сакавіка вайскоўцы патрулявалі мяжу ў раёне Дубічы-Цэркэўне (Падляскае ваяводства). Спрабуючы прадухіліць спробу парушэння мяжы з боку мігрантаў, яны зрабілі некалькі папераджальных стрэлаў, а калі нелегалы не адступілі, “пачалі страляць у зямлю перад імі”.

Сцвярджалася, што ўсяго было здзейснена 43 стрэлы. Пасля гэтага мігранты адмовіліся ад спробы прарыву праз мяжу.