Мінск 22:49

Украіна канцэнтруе цяжкія ўзбраенні на мяжы з Беларуссю, сцвярджае Дзяржпагранкамітэт

Крыніца: ДПК

20 чэрвеня, Позірк. Аб зафіксаваным на мяжы з Беларуссю “павелічэнні групоўкі ўкраінскіх узброеных фарміраванняў, у тым ліку сіл спецыяльных аперацый і спецпадраздзяленняў Галоўнага ўпраўлення выведкі” заявіў 20 чэрвеня Дзяржпагранкамітэт (ДПК).

Ведамства сцвярджае, што “на сумежнай тэрыторыі канцэнтруюцца розныя падраздзяленні, у тым ліку з цяжкім узбраеннем”.

Заяўляецца, што ў склад узбраенняў уваходзяць баявыя машыны МТЛБ, БМП, “уключаючы амерыканскія “Брэдлі”, а таксама рэактыўныя сістэмы залпавага агню HIMARS (ЗША), гаўбіцы М777, зенітныя самаходныя ўстаноўкі “Гепард” нямецкай вытворчасці і інш.

“Памежная служба Рэспублікі Беларусь на мяжы з Украінай нясе службу ва ўзмоцненым рэжыме і сумесна з Міністэрствам абароны рэагуе на змяненне абстаноўкі шляхам павелічэння шчыльнасці прыкрыцця дзяржаўнай мяжы, у тым ліку за кошт магчымасцяў аснашчаных сучасным узбраеннем і ваеннай тэхнікай манеўраных груп паўднёвага напрамку”, — гаворыцца ў паведамленні ДПК.

Забеспячэнне бяспекі на мяжы, адзначае ведамства, ажыццяўляецца “ў цесным узаемадзеянні з часткамі і злучэннямі Узброеных сіл” і “накіраванае на недапушчэнне нагнятання абстаноўкі <…> і папярэджанне правакацый”.

ДПК сцвярджае, што правакацыі “будуць неадкладна спыняцца суб’ектамі забеспячэння нацыянальнай бяспекі”.

22 снежня 2023 года паведамлялася, што Украіна працягвае ўладкоўваць абарончыя пазіцыі на мяжы з Беларуссю.

“Мы разумеем, што наша паўночная мяжа павінна быць максімальна ўмацаваная, — заявіў на той момант камандуючы Аб’яднаных сіл украінскіх Узброеных сіл Сяргей Наеў. — Цяпер сітуацыя на гэтым участку стабільная і кантралюемая. Гэта дае нам час і магчымасць прыняць меры па падрыхтоўцы дадатковых фартыфікацыйных умацаванняў, прызначаных для дадатковых сіл, якія ў далейшым могуць быць перададзены на гэты кірунак у выпадку імклівага абвастрэння сітуацыі”.

Адзначалася, што ўкраінскія войскі ўладкоўваюць камандныя вышыні, ствараюцца “батальённыя рубяжы абароны, якія складаюцца з ротных і ўзводных апорных пунктаў”. На палях ваенныя інжынеры пракопваюць траншэі, супрацьтанкавыя равы, усталёўваюць загараджальныя тэтраэдры і расцягваюць калючы дрот.

У канцы кастрычніка 2023 года паведамлялася, што ў памежжы з Украінай знаходзіцца 1,8 тыс. беларускіх вайскоўцаў.

Падзяліцца:
be