Латушка абмеркаваў у профільным міністэрстве Польшчы магчымасці выплаты пенсій беларусам
![](https://pozirk.online/wp-content/uploads/2024/06/latushko-matsievskaya-partyzanka-1128-21-06.jpg)
22 чэрвеня, Позірк. Выплаты пенсій беларусам, якія маюць статус міжнароднай абароны ў Польшчы, абмеркаваў намеснік кіраўніка Аб’яднанага пераходнага кабінета (АПК), кіраўнік Народнага антыкрызіснага ўпраўлення (НАУ) Павел Латушка з намеснікам міністра сям’і, працы і сацыяльнай палітыкі гэтай краіны Себасцьянам Гаеўскім 21 чэрвеня ў Варшаве.
“У цяперашні час у Польшчы пражываюць больш за 310 тысяч беларусаў — гэта другая па колькасці група замежнікаў. Частка з іх — пенсіянеры. Многія з пенсіянераў не могуць бяспечна вярнуцца дадому. У Польшчы дзейнічае заканадаўства, якое прадугледжвае разлік пенсій зыходзячы з адпаведнага стажу працы на тэрыторыі Польшчы”, — адзначаецца ў тэлеграм-канале беларускага палітыка.
Абазначаны “праблемныя пытанні выплаты пенсій у Польшчы”.
Гаеўскі, паводле Латушкі, выказаў гатоўнасць прааналізаваць праблему, у тым ліку на прыкладах індывідуальных выпадкаў.
Прадугледжваецца, што Дэпартамент па пытаннях сацыяльных выплат падрыхтуе “дарожную карту” сацыяльнай дапамогі для інфармавання грамадзян Беларусі, якія пражываюць у Польшчы, аб магчымасцях атрымання сацыяльных выплат.
Таксама кіраўнік НАУ сустрэўся з намеснікам міністра ўнутраных спраў і адміністрацыі Польшчы Мацеем Душчыкам. Сярод іншага гаворка ішла аб “праблемах легальнага працаўладкавання, выезду за межы Польшчы і затрыманняў з магчымай дэпартацыяй пры адсутнасці дакументаў”.