22 чэрвеня, Позірк. Звязаныя з міграцыйным крызісам на польска-беларускай мяжы праблемы мае намер абмеркаваць са старшынёй КНР Сі Цзіньпінам прэзідэнт Польшчы Анджэй Дуда, які 22–26 чэрвеня наведвае Кітай.
На брыфінгу перад вылетам палітык заявіў, што “найбольш важнымі элементамі візіту з’яўляюцца бяспека і эканамічныя пытанні, уключаючы гандаль”, аднак таксама “будзе вельмі важны палітычны складнік”.
“Мы маем вайну ва Украіне, а таксама гібрыдную атаку Беларусі на польскую мяжу, у рамках якой беларускія ўлады апошнія тры гады пастаянна падштурхоўваюць мігрантаў да нас, прымушаючы іх спрабаваць нелегальна перасекчы мяжу”, — цытуе Дуду яго прэс-служба.
Паводле яго слоў, гэта праблема звязана ў тым ліку з эканомікай, паколькі закранае рэалізацыю кітайскай ініцыятывы “Адзін пояс — адзін шлях”. Прэзідэнт Польшчы патлумачыў, што праз міграцыйны крызіс зазнае абмежаванні адзін з чыгуначных маршрутаў дастаўкі кітайскіх тавараў у Еўропу — той, які праходзіць праз Беларусь.
“Стасункі Кітая з Беларуссю традыцыйна дружалюбныя. Я хачу прадставіць гэтую сітуацыю старшыні КНР Сі Цзіньпіну. І распавесці, з чым мы сутыкаемся”, — заявіў Дуда.
“Гэты візіт вельмі важны для нашай бяспекі ў Еўропе. Мы ведаем, што Кітай — звышдзяржава, мы ведаем, што ў яго сяброўскія стасункі не толькі з Беларуссю, але і з Расіяй, а Расія сёння з’яўляецца агрэсарам ва Украіне. І гэта тое, што я хачу абмеркаваць са старшынёй Сі Цзіньпінам. Ні для каго не сакрэт, што ўплыў Кітая, у тым ліку і на Расію, безумоўна, вялікі. Прадставіць наш пункт гледжання на гэтае пытанне старшыні Сі Цзіньпіну, на мой погляд, вельмі важна”, — дадаў палітык.
Перамовы Дуды і Сі Цзіньпіна запланаваныя на 24 чэрвеня. У той жа дзень польскі госць сустрэнецца з прэм’ер-міністрам КНР Лі Цянам ды інш.
Ад пачатку года суседнія краіны ЕС спынілі 22,1 тыс. спробаў нелегальнага перасячэння мяжы мігрантамі з боку Беларусі, у тым ліку Польшча — 19,3 тыс.
Міграцыйны крызіс, які цягнецца з вясны 2021 года, Варшава, Рыга і Вільнюс называюць “гібрыднай атакай”, арганізаванай рэжымамі Аляксандра Лукашэнкі і Уладзіміра Пуціна.
6 чэрвеня стала вядома пра смерць польскага вайскоўца 1-й танкавай брыгады Матэвуша Сітака, параненага нажом 28 траўня на мяжы з Беларуссю. Паводле інфармацыі Памежнай аховы Польшчы, вайсковец зазнаў напад мігранта, які ў складзе вялікай групы спрабаваў незаконна перасекчы мяжу з боку Беларусі.
13 чэрвеня на польска-беларускай мяжы распачала дзеянне буферная зона. Паводле інфармацыі МУС Польшчы, дзякуючы ёй колькасць спробаў парушэння мяжы скарацілася прыкладна на траціну.
Беларускія пагранічнікі неаднаразова абвінавачвалі еўрапейскіх калег у жорсткім абыходжанні з мігрантамі.
