Беларускім тэнісістам для ўдзелу ва Уімблдоне зноў давядзецца падпісаць дэкларацыю аб нейтралітэце

23 чэрвеня, Позірк. Беларускім і расійскім тэнісістам для ўдзелу ва Уімблдонскім турніры неабходна, як і год таму, падпісаць дэкларацыю аб нейтралітэце, паведамляе ТАСС.

Уімблдон — адзін з чатырох турніраў Вялікага шлема, праводзіцца ў Англіі на травяным пакрыцці. Спаборніцтвы асноўнай сеткі пройдуць 1–14 ліпеня.

20 красавіка 2022 года аргкамітэт Уімблдонскага тэніснага турніру часова адхіліў спартсменаў з Расіі і Беларусі ад удзелу ў спаборніцтвах. Рашэнне было прынятае ў сувязі з поўнамасштабнай вайной, развязанай РФ супраць Украіны, якая на пачатковым этапе і ў асобныя перыяды пасля вялася ў тым ліку з тэрыторыі Беларусі.

31 сакавіка 2023 года Усеанглійскі клуб лаўн-тэніса і кракета (AELTC), які з’яўляецца арганізатарам спаборніцтваў, заявіў, што гатовы дапусціць спартсменаў з Беларусі і РФ да Уімблдона ў нейтральным статусе пры выкананні “адпаведных умоў”.

Адна з умоў — “забарона на выказванне падтрымкі ўварвання Расіі ва Украіну ў розных формах”. Паведамлялася, што ва ўдзеле таксама будзе адмоўлена тым гульцам, якія атрымліваюць “фінансаванне ад расійскай і/або беларускай дзяржавы (уключаючы спонсарства з боку кампаній, якія знаходзяцца пад кіраваннем або кантролем гэтых дзяржаў)”.

Беларускія тэнісісты пагадзіліся з такімі ўмовамі і згулялі на турніры.