Рабочая група па аналізе дзейнасці НАН вывучыць распрацоўку тэхналогій і імпартазамяшчальнай прадукцыі

25 чэрвеня, Позірк. Рабочая група па аналізе дзейнасці Нацыянальнай акадэміі навук Беларусі (НАН) на першым пасяджэнні 25 чэрвеня разгледзела “арганізацыйныя пытанні” і ўзгадніла “алгарытм далейшай працы”, паведамляе прэс-служба Камітэта дзяржкантролю (КДК).

Адзначаецца, што на працягу 10 рабочых дзён павінен быць зацверджаны план дзейнасці групы.

Сярод пытанняў, якія яна мае намер вывучыць, пазначаныя “практыка-арыентаванасць і выніковасць навуковых даследаванняў і распрацовак навукоўцаў НАН”, “укараненне распрацовак у галінах эканомікі і сацыяльнай сферы”, “распрацоўка імпартазамяшчальнай прадукцыі і тэхналогій”, “экспарт навуковай прадукцыі”.

У пасяджэнні рабочай групы пад старшынствам кіраўніка КДК Васіля Герасімава ўдзельнічалі намеснік старшыні Усебеларускага народнага сходу Аляксандр Косінец, член-карэспандэнт НАН Міхаіл Мясніковіч, старшыня прэзідыума НАН Уладзімір Гусакоў, а таксама, як заяўляецца, “прадстаўнікі міністэрстваў і ведамстваў, аўтарытэтныя навукоўцы і незалежныя кампетэнтныя эксперты”.

“Аб выніках працы і прапановах па рашэнні выяўленых праблем рабочая група будзе штогод дакладваць кіраўніку дзяржавы”, — падкрэсліваецца ў паведамленні.

Распараджэнне аб стварэнні рабочай групы па аналізе дзейнасці НАН 18 чэрвеня падпісаў Аляксандр Лукашэнка. У групу ўключаныя 14 чалавек.

Забеспячэнне дзейнасці групы ўскладзена на КДК.