Румынія, якая прымае сесію ПА АБСЕ, заклікала Беларусь спыніць садзейнічанне агрэсіі РФ

29 чэрвеня, Позірк. З заклікам перастаць дапамагаць Расіі ў яе агрэсіі супраць Украіны звярнуўся да Беларусі 29 чэрвеня ў Бухарэсце кіраўнік румынскай дэлегацыі на 31-й сесіі Парламенцкай асамблеі Арганізацыі па бяспецы і супрацоўніцтве ў Еўропе (ПА АБСЕ) Дан Барна.

Румынія з’яўляецца прымаючай краінай цяперашняй сесіі ПА АБСЕ, якая працягнецца па 3 ліпеня.

Варта адзначыць, што заклік быў завочным — раней Бухарэст не дазволіў прыбыць у краіну для ўдзелу ў сесіі ПА АБСЕ ні беларускай, ані расійскай дэлегацыі.

Міністэрства замежных спраў Беларусі раскрытыкавала гэтае рашэнне. Беларуская дэлегацыя заявіла, што Мінск “не прызнае рашэнні, якія могуць быць прынятыя падчас сесіі ў дачыненні да Беларусі”.