Гарбунова назвала “вельмі важным крокам гуманнасці” вызваленне шэрагу палітвязняў

3 ліпеня, Позірк.ц  “Падпісаны закон “Аб амністыі” прадэманстраваў імкненне да гуманнасці”, — заявіла прадстаўніца Аб’яднанага пераходнага кабінета (АПК) па сацыяльнай палітыцы Вольга Гарбунова, каментуючы 3 ліпеня вызваленне шэрагу палітвязняў, якое, паводле пэўнай інфармацыі, адбылося менавіта на падставе гэтага дакумента.

“Сацыяльна-медычныя крытэрыі павінны распаўсюдзіцца на ўсіх, без дыскрымінацыі, таму што жыццёвыя абставіны, стан здароўя, узрост не залежаць ад палітычных поглядаў, — цытуе яе прэс-служба АПК. — Крок гуманнасці, які мы бачым сёння, вельмі важны: і для людзей, якім патрэбная дапамога, і для сем’яў, якія так доўга чакалі і падтрымлівалі ў гэтым выпрабаванні блізкіх. І гэта надзея для ўсіх астатніх палітвязняў, якім таксама патрэбная дапамога”.

Гарбунова выказала спадзеў на тое, што “людзі ў цяжкім стане, з інваліднасцю, з анказахворваннямі вернуцца дадому ў найбліжэйшы час”.

“Надзвычайна важна зараз заставацца адказнымі і акуратнымі ў публічных інтэрпрэтацыях, гіпотэзах і ацэнцы падзей. У чым бы ні была сапраўдная прычына прынятага рашэння, гуманітарныя місіі не павінны палітызавацца і выкарыстоўвацца на шкоду людзям, іх жыццю і свабодзе”, — падкрэсліла прадстаўніца АПК.

2 ліпеня Аляксандр Лукашэнка анансаваў вызваленне цяжкахворых апанентаў улады. У той жа дзень ён падпісаў закон аб амністыі з нагоды 80-годдзя вызвалення Беларусі, які аднак, згодна са зместам, не распаўсюджваецца на асоб з “экстрэмісцкіх спісаў”.

Разам з тым, паводле інфармацыі праваабаронцаў, 3 ліпеня дакладна вядома пра пяць палітвязняў (дзве жанчыны, трое мужчын), якія выйшлі на волю на падставе амністыі. Адзін з іх — анкахворы палітык Рыгор Кастусёў. Імёны астатніх пакуль не называюцца.