Праваабаронцы пацвердзілі вынясенне ў Беларусі смяротнага выраку грамадзяніну Германіі

19 ліпеня, Позірк. Праваабарончы цэнтр “Вясна” пацвердзіў факт таго, што 24 чэрвеня Мінскі абласны суд вынес смяротны вырак 30-гадоваму грамадзяніну Германіі Рыка Крыгеру.

Першым інфармацыю пра прыгавор са спасылкай на ўласныя крыніцы распаўсюдзіў тэлеграм-канал “МотолькоПомоги”.

Паводле інфармацыі праваабаронцаў, справа нібыта тычылася дачынення Крыгера да беларускага добраахвотніцкага палку імя Кастуся Каліноўскага, які ваюе на баку Украіны, аднак вайсковае фарміраванне не пацвердзіла СМІ якую-небудзь сувязь з гэтым мужчынам.

На гэты момант невядома, ці быў абскарджаны вырак, ці набыў ён моц.

Крымінальную справу на Крыгера, як паведамляў “Позірк”, Мінаблсуд разглядаў з 6 чэрвеня. Грамадзянін ФРГ абвінавачваўся паводле ч. 4 арт. 295 (незаконныя дзеянні ў адносінах да агнястрэльнай зброі, боепрыпасаў і выбуховых рэчываў), ч. 4 арт. 309 (наўмыснае прывядзенне ў непрыдатнасць транспартнага сродку або шляхоў зносін), ч. 3 арт. 361¹ (стварэнне экстрэмісцкага фарміравання або ўдзел у ім), ч. 3 арт. 289 (акт тэрарызму), арт. 358¹ (агентурная дзейнасць) і арт. 133 (наёмніцтва) Крымінальнага кодэкса.

Праваабаронцы тады заявілі, што гэта першы вядомы ім працэс за “наёмніцтва”, адзначыўшы, што сутнасць абвінавачанняў незразумелая.

Ч. 3 арт. 289 КК звязаная з дзеяннямі, “здзейсненымі арганізаванай групай, або з прымяненнем аб’ектаў выкарыстання атамнай энергіі, або з выкарыстаннем радыеактыўных рэчываў або ядзерных матэрыялаў, моцнадзейных, таксічных хімічных або біялагічных рэчываў або спалучанымі з забойствам чалавека”. Санкцыя па ёй — пазбаўленне волі на тэрмін ад 10 да 25 гадоў са штрафам або без штрафу, пажыццёвае пазбаўленне волі або смяротнае пакаранне.

Паводле даных праваабаронцаў, Крыгер нарадзіўся ў нямецкай сталіцы, мае непаўналетняе дзіця. Працаваў санітарам-выратавальнікам у Нямецкім Чырвоным Крыжы, афіцэрам па спецыяльнай бяспецы ў амбасадзе ЗША ў Берліне. З гэтай пасады ён перайшоў у сферу аховы здароўя, працаваў медбратам, спецыялізаваўся на хуткай медыцынскай дапамозе.