Віцэ-спікер Сената Польшчы: Абмежаванні на ўезд у ЕС для беларусаў амаральныя

22 ліпеня, Позірк. Дазвол на перасячэнне мяжы Еўрапейскага саюза і Беларусі для грузавікоў, якія “даюць зарабляць грошы [Аляксандру] Лукашэнку і яго камандзе”, і адначасовыя абмежаванні на яе перасячэнне для ўсіх аўтамабіляў з беларускімі нумарамі — “гэта вельмі амаральна”, заявіў віцэ-спікер Сената Польшчы Міхал Каміньскі ў гутарцы з дарадцам дэмлідэра Святланы Ціханоўскай па парламенцкім супрацоўніцтве і канстытуцыйнай рэформе Анатолем Лябедзькам.

Відэазапіс размешчаны на ютуб-канале “ПРАНАС”.

Абмежаванні на ўезд у ЕС для наведвання сваякоў “ахвярам гэтага рэжыму, звычайным беларусам” — палітычная памылка і амаральныя дзеянні “Еўрапейскага саюза або канкрэтных краін гэтага саюза”, лічыць парламентарый.

“Я буду прапаноўваць усім дэпутатам Еўрапейскага саюза актыўна змагацца за тое, каб ЕС не зачыняў дзверы для грамадзян Беларусі, якіх мы лічым суграмадзянамі нашага еўрапейскага грамадства”, — падкрэсліў віцэ-спікер.

“Беларусы — члены той жа самай сям’і, якая называецца Еўропа”, — дадаў Каміньскі.

На думку польскага палітыка, беларусы, “на жаль, сёння знаходзяцца ва ўмовах дыктатуры, але гэта не іх віна”: “І мы як еўрапейцы, як палякі, як літоўцы, як суседзі беларускага народа павінны рабіць усё, каб дапамагаць беларусам”.

Дапамога — гэта “адкрыццё межаў, а не іх закрыццё”, сказаў палітык. “Мы не павінны дапамагаць Лукашэнку ўмацоўваць сваю дыктатуру”, — заявіў ён.

Аб сустрэчы віцэ-спікера Сената Польшчы з дарадцам Ціханоўскай стала вядома напярэдадні. Паведамлялася, што на ёй узнімаліся тэмы старшынства Польшчы ў ЕС у першай палове 2025 года і дзейнасць дэпутацкай групы “За дэмакратычную Беларусь”. Дасягнута дамоўленасць аб правядзенні налета ў Варшаве парламенцкага форума на беларускую тэму.

З 9 ліпеня ў рамках выканання рашэння Еўразвяза аб сінхранізацыі санкцый супраць Расіі і Беларусі Польшча пускае на сваю тэрыторыю аўтамабілі з беларускімі нумарамі, толькі калі за рулём знаходзіцца ўладальнік. Больш жорсткія правілы ўвялі краіны Балтыі — Латвія, Літва і Эстонія.

Акрамя таго, у беларускіх грамадзян узніклі цяжкасці з перавозкай тавараў праз мяжу з ЕС.

Ціханоўская 16 ліпеня заявіла, што “абмежаванні на ўезд у Еўразвяз аўтамабіляў з беларускай рэгістрацыяй — паспешнае і шкоднае рашэнне, якое б’е па людзях, а не па рэжыме Лукашэнкі”.