Узровень занятасці насельніцтва ў другім квартале нязначна знізіўся — Белстат

23 ліпеня, Позірк. Узровень беспрацоўя, разлічаны ў адпаведнасці з метадалогіяй Міжнароднай арганізацыі працы (фактычнае беспрацоўе), у другім квартале 2024 года знізіўся на 0,3 працэнтнага пункта — з 3,3 да 3%, сведчыць праведзены “Позіркам” аналіз звестак Белстата па выніках выбарачнага абследавання хатніх гаспадарак.

Узровень занятасці насельніцтва ў працаздольным узросце склаў 84,2% (у мінулым квартале — 84,3%), у тым ліку сярод жанчын — 85,3% (85,2%), мужчын — 83,3% (83,5%); гарадскога насельніцтва — 84,5% (84,8%), сельскага — 83,3% (82,6%).

Беспрацоўнымі з’яўляецца 3,3% мужчын (3,5%) і 2,7% жанчын (3%). У гарадах няма працы ў 3% насельніцтва працаздольнага ўзросту (3,1%), у сельскай мясцовасці — у 3,2% (3,8%).

Паводле звестак Белстата, 65,3% (61,4%) беспрацоўных спрабуе працаўладкавацца з дапамогай сяброў, сваякоў і знаёмых, 64,7% (63,6%) — праз СМІ і інтэрнэт, 12,6% (22,5%) — праз службу занятасці і агульнарэспубліканскі банк вакансій, 12,5% (21,2%) — непасрэдна звяртаючыся да працадаўцаў.

За студзень — травень 2024 года ў Беларусі нанята на 14,95% работнікаў менш, чым звольнена — 221.047 супраць 254.092, сведчыць праведзены “Позіркам” аналіз звестак Нацыянальнага статыстычнага камітэта.

Паводле інфармацыі Белстата, у беларускай эканоміцы ў траўні 2024 года было занята 4 млн 112,2 тыс. чалавек — на 0,4% менш (-16,9 тыс.), чым у студзені, і на 0,9% менш, чым у траўні 2023-га (-38,5 тыс.).