25 ліпеня, Позірк. У дачыненні да Таццяны Францкевіч — маці палітзняволенага актывіста анархісцкага руху Аляксандра Францкевіча — распачатая крымінальная справа, паведаміла на сваёй старонцы ў “Фэйсбуку” заснавальніца праваабарончай ініцыятывы “Палітвязынка” Яўгенія Доўгая.
Паводле яе слоў, падазраванай па справе таксама з’яўляецца сястра жанчыны Наталля Лабацэвіч.
Цяпер яны знаходзяцца ў віцебскім СІЗА. У чым іх абвінавачваюць, не ўдакладняецца.
Паводле даных “Медыязоны”, іх абвінавачваюць паводле арт. 3611 Крымінальнага кодэкса (стварэнне экстрэмісцкага фарміравання альбо ўдзел у ім).
Паводле інфармацыі “Радыё Свабода” жанчыны не выйшлі на волю пасля затрымання 19 ліпеня.
Францкевіч і Лабацэвіч былі затрыманыя ў ваўкавыскай калоніі № 11 (Гродзенская вобласць), куды яны прыехалі, каб перадаць перадачу палітвязню.
Аляксандр Францкевіч асуджаны па “справе анархістаў” на 16 гадоў і 9 месяцаў пазбаўлення волі. Прызнаны вінаватым паводле дзевяці артыкулаў Крымінальнага кодэкса.
У сакавіку 2023 года Камітэт дзяржбяспекі ўключыў яго ў спіс “асоб, якія маюць дачыненне да тэрарыстычнай дзейнасці”.
