Камітэт ААН па ліквідацыі дыскрымінацыі жанчын заклікаў спыніць ізаляцыю Марыі Калеснікавай
26 ліпеня, Позірк. Камітэт ААН па ліквідацыі дыскрымінацыі ў адносінах да жанчын запатрабаваў спыніць утрыманне палітзняволенай Марыі Калеснікавай без сувязі са знешнім светам, паведамляе тэлеграм-канал каманды палітыка Віктара Бабарыкі.
Камітэт таксама заклікаў беларускія ўлады “неадкладна даць доступ да адваката і аднавіць зносіны Марыі са сваякамі”.
Запыт накіравала праваабарончая арганізацыя Respect-Protect-Fulfill (RPF), якая базуецца ў Літве. “Мы не можам дазволіць сабе бяздзейнасць і верым у сілу рэгулярных напамінкаў. Каб дасягнуць гендэрнай роўнасці, беспадстаўных заяў недастаткова. Неабходна выконваць міжнародныя дамоўленасці”, — лічаць праваабаронцы.
Беларусь “атрымала шанец прадэманстраваць сваю прыхільнасць тым каштоўнасцям, пра якія заяўляе”, і зрабіць гэта можна “проста зараз — спыніўшы катаванні Марыі і вярнуўшы ёй сувязь з блізкімі”, лічаць у RPF.
Асуджаная 6 верасня 2021 года на 11 гадоў пазбаўлення волі Марыя Калеснікава была спікерам і кіраўніком выбарчага штаба былога старшыні праўлення “Белгазпрамбанка” Віктара Бабарыкі на прэзідэнцкіх выбарах 2020 года. Пасля затрымання экс-банкіра далучылася да каманды Ціханоўскай і стала адной з прадстаўніц Аб’яднанага штаба разам з Веранікай Цапкала, жонкай яшчэ аднаго прэтэндэнта на пасаду прэзідэнта Валера Цапкалы.
У лістападзе 2022 года Калеснікаву экстранна прааперавалі ў Гомельскай гарадской клінічнай бальніцы хуткай медыцынскай дапамогі, куды яе даставілі ў цяжкім стане. У палітзняволенай дыягнаставалі перытаніт (запаленне брушыны), які стаў ускладненнем прабадной язвы.
З-за інфармацыйнай блакады, якую чыніць адміністрацыя калоніі, інфармацыі аб яе стане практычна няма.
Палітзняволеная адчувае “моцныя праблемы са здароўем, у тым ліку высокі ціск”, паведаміла (https://pozirk.online/be/news/79232) 11 красавіка заснавальніца ініцыятывы “Палітвязынка” Яўгенія Доўгая. Паводле яе інфармацыі, Калеснікавай “не надаюць неабходную медыцынскую дапамогу”.
У сакавіку Камітэт ААН па ліквідацыі дыскрымінацыі жанчын заклікаў (https://pozirk.online/be/news/74541) Беларусь прыняць тэрміновыя меры для абароны палітзняволенай Паліны Шарэнды-Панасюк, гэта быў першы падобны выпадак па справах супраць Беларусі, адзначала RPF.
Віктар Бабарыка адбывае 14-гадовае пазбаўленне волі ва ўмовах узмоцненага рэжыму.