27 ліпеня, Позірк. Праверыць “законнасць работ, якія праводзяцца ўласнікам на абрынутым будынку” па адрасе вул. Сялянская, 42 у Гомелі, вырашана 27 ліпеня па выніках пасяджэння штаба па ліквідацыі наступстваў надзвычайнай сітуацыі, паведаміў у сваім тэлеграм-канале старшыня гарвыканкама Уладзімір Прывалаў.
“Работы па разборы абвалу завершаныя, робяцца захады па абмежаванні ў аварыйны будынак доступу. Прашу гамяльчан захоўваць спакой. Сітуацыя будзе на кантролі да поўнага высвятлення абставін здарэння”, — напісаў чыноўнік.
Пазней Прывалаў наведаў месца здарэння, ацаніў маштаб разбурэнняў і аб’ём выкананых ратавальнікамі і камунальнікамі работ.
“Правялі на месцы кароткую нараду з прадстаўнікамі розных службаў, яшчэ раз абмеркавалі далейшыя крокі па ліквідацыі наступстваў аварыі і далейшым лёсе будынка. Цяпер ініцыяваныя дадатковыя праверкі іншых будынкаў у горадзе, каб прадухіліць магчымыя рызыкі і гарантаваць бяспеку грамадзян”, — адзначыў старшыня гарвыканкама.
Нежылы будынак па згаданым адрасе часткова абрынуўся ўвечары 26 ліпеня, паводле наяўнай на гэты момант інфармацыі, ніхто не пацярпеў.
Да 2022 года ў тым будынку размяшчаўся аддзел унутраных спраў адміністрацыі Цэнтральнага раёна абласнога цэнтра. Увосень 2023 года будынак быў выстаўлены на аўкцыён, цяпер у рэестры Дзяржкамітэта па маёмасці як аб’ект, які прадаецца, ён не фігуруе.
“Флагшток” са спасылкай на крыніцу паведаміў, што пабудову набыў прыватны прадпрымальнік, які “хацеў зрабіць са старога будынка міліцыі гандлёвы цэнтр з мінімальнымі ўкладаннямі”. “Новы ўласнік-прыватнік вырашыў не замарочвацца з праектам. Экспертызы не было, рабочыя свідравалі сцены і пашыралі вокны на свой страх і рызыку”, — заявіла крыніца медыя.
