На краме экс-палітвязня Фурманава ў Вільнюсе невядомыя напісалі “вяртайцеся дадому, беларускія свінні”

28 ліпеня, Позірк. На будынку крамы сувеніраў “Кропка” ў ноч на 28 ліпеня невядомыя пакінулі надпіс на літоўскай мове “вяртайцеся дадому, беларускія свінні”, паведамляе выданне “Новая газета. Балтыя”.

Таксама ў краме разбітае акно.

Крама належыць сямейнай пары з Беларусі Дзмітрыю Фурманаву і яго жонцы Вользе. Мужчына з’яўляецца былым палітвязнем.

У “Кропцы” прадаюцца сувеніры, вырабленыя ў тым ліку майстрамі, якія вымушана пакінулі Беларусі пад пагрозай палітычнага пераследу.

Творчую прастору і краму “Кропка” ў Вільнюсе пара адкрыла ў траўні 2024 года.

У інтэрв’ю “Позірку” 29 траўня Фурманаў называў краму “сямейным праектам”.

“Мы бачылі, што ёсць запыт на краму беларускіх сувеніраў, і вырашылі паспрабаваць. Да нас адразу прыйшлі майстры, якія жывуць у Вільнюсе. І яны казалі, што ім не хапае месца, дзе можна прадаваць сваю прадукцыю. У нас таксама ёсць памяшканне побач з крамай, дзе можна праводзіць розныя мерапрыемствы”, — сказаў былы палітвязень.

Фурманаў быў затрыманы 29 траўня 2020 года ў Гродне падчас пікету па зборы подпісаў за вылучэнне Святланы Ціханоўскай кандыдатам ў прэзідэнты Беларусі. У той жа дзень быў затрыманы Сяргей Ціханоўскі.

20 траўня 2021 года Фурманава асудзілі на 2 гады пазбаўлення волі ў калоніі агульнага рэжыму паводле ч. 1 арт. 342 Крымінальнага кодэкса (арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх).

21 кастрычніка 2021 года палітвязень выйшаў на волю з калоніі № 3 (пасёлак Віцьба, Віцебскі раён). Неўзабаве з’ехаў з Беларусі.

Міжнародная праваабарончая арганізацыя Amnesty International прызнала Фурманава вязнем сумлення.

Паводле звестак Дэпартамента міграцыі пры Міністэрстве ўнутраных спраў Літвы, на 1 ліпеня ў гэтай краіне пражывала 62.535 грамадзян Беларусі.

На 1 студзеня іх было 62.167. Такім чынам, за паўгода беларуская дыяспара — другая ў краіне па колькасці — вырасла на 0,6%.

Самая шматлікая нацыянальная група замежнікаў у Літве — украінцы, іх налічвалаася 76.145. Міграцыйная служба адзначала, што з іх амаль 44.000 — “уцекачы, якія ратуюцца ад расійскай агрэсіі і на якіх распаўсюджваецца дзеянне ўведзенага ЕС механізму часовай абароны”.

Трэцяя па велічыні дыяспара ў Літве — расіяне (на 1 ліпеня — 15.536; -2,2% у параўнанні з 1 студзеня), чацвёртая — узбекі (10.200; +24,4%), пятая — таджыкі (каля 7.000; +22,8%).

На пачатак другога паўгоддзя ў літоўскай дзяржаве пражывала 221.285 замежнікаў, за паўгода іх колькасць зменшылася на 0,3%.