Ціханоўская прыняла адстаўку Сахашчыка

1 жніўня, Позірк. Святлана Ціханоўская прыняла адстаўку Валерыя Сахашчыка. Лідар дэмсіл падзякавала калеге за працу.

”Сёння я прыняла адстаўку Валерыя Сахашчыка з пасады прадстаўніка па абароне і нацыянальнай бяспецы Кабінета. Я ўдзячная Валерыю Сцяпанавічу за зробленую ў межах кабінета працу, за дапамогу, якую ён арганізоўваў для беларускіх добраахвотнікаў і ветэранаў. За працу з замежнымі партнёрамі дэмакратычных сіл, падчас якой ён уздымаў пытанні захавання незалежнасці Беларусі”, — цытуе Ціханоўскую тэлеграм-канал Аб’яднанага пераходнага кабінета (АПК).

Яна пагадзілася, што не ўсе планы ўдалося рэалізаваць, але заявіла, што застаецца з Сахашчыкам “на сувязі і ў нармальных працоўных адносінах”.

Сахашчык займаў пасаду прадстаўніка АПК па абароне і нацыянальнай бяспецы амаль два гады, з моманту заснавання кабінета падчас першай канферэнцыі “Новая Беларусь” у жніўні 2022 года ў Вільнюсе. Ён сфармаваў беларускую асобную дэсантна-штурмавую роту ў складзе Узброеных сіл Украіны.

1 жніўня Сахашчык заявіў, што сыходзіць з кабінета і засяродзіцца на развіцці свайго бізнесу, на дапамозе беларусам, якія маюць у ёй патрэбу, на развіцці “канцэпцыі нацыянальнага прымірэння, грамадзянскага дыялогу”.