Урад плануе рост ВУП на 4,1% па выніках 2025 года
31 ліпеня, Позірк. Дасягнуць росту эканомікі на ўзроўні 4,1% плануюць беларускія ўлады ў 2025 годзе, вынікае з заявы прэм’ер-міністра Рамана Галоўчанкі 31 ліпеня на пасяджэнні прэзідыума Савета міністраў.
Паводле інфармацыі прэс-службы ўрада, на пасяджэнні быў разгледжаны пакет прагнозных дакументаў на наступны год. Сярод іх праекты ўказаў пра важнейшыя паказчыкі і параметры прагнозу сацыяльна-эканамічнага развіцця, пра мэтавыя паказчыкі грашова-крэдытнай палітыкі; праекты законаў “Аб рэспубліканскім бюджэце”, змены ў Падатковы кодэкс.
“Рэалізацыя мэтавага сцэнарыя”, сцвярджае Галоўчанка, дазволіць забяспечыць у 2025 годзе рост рэальных грашовых даходаў насельніцтва на 4%, рэальнага заробку — на 4,7%. Інвестыцыйнае развіццё ў адпаведнасці з планамі павінна вырасці на 7,8%, аб’ём экспарту тавараў і паслуг — на 5,4%. Звярнуўшы ўвагу на кантроль за ростам цэн, чыноўнік заявіў, што інфляцыя, як плануецца, не павінна перавысіць 5%.
Прагноз сацыяльна-эканамічнага развіцця, паводле слоў прэм’ера, павінен “адказваць патрабаванням эканамічнай бяспекі і ўстойлівасці дзяржавы”. “Паказчыкі традыцыйна напружаныя, што з’яўляецца апраўданым ва ўмовах працяглай мабілізацыі эканомікі”, — сказаў ён.
Кажучы пра фармаванне бюджэту, Галоўчанка адзначыў, што яго даходная частка “запланаваная з невялікім прыростам — 7,8%, з чаканымі паступленнямі ў аб’ёме 45,5 млрд рублёў”. Пры гэтым “бюджэт плануецца з дэфіцытам”, паведаміў чыноўнік.
Валавы ўнутраны прадукт Беларусі за студзень — чэрвень 2024 года склаў 113,8 млрд рублёў — у супастаўных цэнах на 5% больш, чым за аналагічны перыяд 2023-га, вынікае з першай ацэнкі Нацыянальнага статыстычнага камітэта.
У студзені рост эканомікі склаў 2,8%, студзені — лютым — 4%, студзені — сакавіку — 4,1%, студзені — красавіку — 5,1%, студзені — траўні — 5,2%.
Згодна з найважнейшымі прагнознымі (дэ-факта планавымі) параметрамі развіцця краіны на 2024 год, прырост ВУП павінен скласці 3,8%.
Міжнародны валютны фонд чакае рост беларускай эканомікі на ўзроўні 2,4%, Сусветны банк — 1,2%, Еўрапейскі банк рэканструкцыі і развіцця — 2,8%, даследчы цэнтр BEROC — 4%, Еўразійскі фонд стабілізацыі і развіцця — 3,7% .
У 2023 годзе ВУП павялічыўся на 3,9%, у 2022-м — знізіўся на 4,7%, у 2021-м эканоміка вырасла на 2,3%, у 2020-м — скарацілася на 0,9%.
Рэальныя наяўныя грашовыя даходы насельніцтва (даходы з улікам інфляцыі) у студзені — траўні 2024 года павялічыліся на 9,6% (месяцам раней — 9,8%) у параўнанні з аналагічным перыядам 2023-га, вынікае з паведамлення Нацыянальнага статыстычнага камітэта.
Згодна з важнейшымі прагнознымі параметрамі развіцця краіны на 2024 год, рэальныя наяўныя грашовыя даходы насельніцтва павінны вырасці на 3,5%, рэальныя заробкі — на 3,9%, намінальны сярэднямесячны заробак павінен узрасці да 2.087 рублёў (у бюджэтным сектары — да 1.634).
Паводле даных Белстата, спажывецкія цэны ў чэрвені 2024 года выраслі на 0,6%, з пачатку года — на 3,4%, у гадавым выражэнні — на 5,8%.