Латушка: Адукацыя ў руках дыктатара выкарыстоўваецца для распаўсюджання ідэалогіі

1 верасня, Позірк. Адукацыя “ў руках дыктатара выкарыстоўваецца не для інвестыцый у будучыню, а як рэсурс для распаўсюджвання ідэалогіі”, адзначыў 1 верасня намеснік кіраўніка Аб’яднанага пераходнага кабінета, кіраўнік Народнага антыкрызіснага упраўлення Павел Латушка.

Паводле Латушкі, якога цытуе прэс-служба НАУ, “у інтарэсах расійскай рыторыкі перапісваюцца падручнікі гісторыі”, а ў інтарэсах рэжыму “ўводзяцца факультатывы ідэалагічнай накіраванасці, ідэалагізацыя закранае і ВНУ”. 

“6 кастрычніка 2022 года так званае Міністэрства адукацыі апублікавала пастанову “Аб установе вышэйшай адукацыі”, якая пашырыла функцыі беларускіх ВНУ. Цяпер беларускія ўніверсітэты павінны выконваць функцыі фарміравання грамадзянскасці на падставе дзяржаўнай ідэалогіі. У тэксце дакумента гэтая функцыя стаіць вышэй, чым правядзенне ў ВНУ навуковых даследаванняў. Гэта дэманструе рэальныя адносіны рэжыму да адукацыі”, — падкрэсліў Латушка.

Сістэма адукацыі ў руках рэжыму разбураецца і дэградуе, адзначыў палітык: “Веды ў школах і ва ўніверсітэтах улады ўсё часцей імкнуцца падмяніць ідэалогіяй. Як вынік — зніжэнне пазіцыі беларускіх ВНУ ў рэйтынгах. На гэта рэжым не звяртае ўвагі, бо ён не зацікаўлены ў адукаваных людзях, яму патрэбны паслухмяны “мабілізацыйны рэсурс”.

“Але спыніць прагрэс немагчыма. Сёння адукацыя ў руках сумленных настаўнікаў і выкладчыкаў, думаючых вучняў і бацькоў. Менавіта мы адказныя за тое, каб укласці ў нашых дзяцей імкненне да свабоды, навучыць іх, прывіць любоў да беларускай гісторыі, культуры, мовы. Бо менавіта ад таго, што мы ўкладзем у нашых дзяцей, будзе залежаць тое, у якой краіне мы будзем жыць заўтра”, — падкрэсліў Латушка.

Прадстаўніца АПК па нацыянальным адраджэнні Аліна Коўшык, у сваю чаргу, падзякавала “кожнаму, хто вучыць і вучыцца сумленна, нягледзячы на створаныя сістэмай умовы, бо самае бяскрыўднае супрацьстаянне рэжымным парадкам і ідэалогіі стала небяспечным выклікам”.

“Я веру, што Дзень ведаў рана ці позна верне сваё добрае значэнне, напоўніцца новымі сэнсамі — і нам не трэба будзе нанова даказваць аксіёмы. Што ў Беларусі на ўроках мусіць гучаць беларуская мова. Што навучальныя ўстановы павінны насіць імёны нацыянальных герояў, вучоных, асветнікаў і паэтаў. Што палітыцы, прапагандзе, выкрывальніцтву нябачных ворагаў і апраўданню вайны – не месца ні ў школьных класах, ні ва ўніверсітэцкіх аўдыторыях”, — падкрэсліла Коўшык.