Барэль пацвердзіў “нязменную падтрымку” тых, хто выступае за свабодную, незалежную і дэмакратычную Беларусь

29 чэрвеня, BPN. У сувязі з узмацненнем рэпрэсій з боку рэжыму Лукашэнкі вярхоўны прадстаўнік Еўрасаюза па замежных справах і палітыцы бяспекі Жазэп Барэль падчас адкрыцця ў Брусэлі першай сустрэчы Кансультатыўнай групы Беларусь — ЕС “пацвердзіў нязменную падтрымку Еўрасаюзам усіх тых, хто мужна выступае за свабодную, незалежную і дэмакратычную Беларусь “. Пра гэта паведамляе прэс-служба Еўрапейскай службы знешніх дзеянняў.

“Выступаючы ў якасці пляцоўкі для дыялогу паміж ЕС і прадстаўнікамі беларускай грамадзянскай супольнасці, кансультатыўная група забяспечыць абмен інфармацыяй аб сітуацыі ў краіне і дапаможа фармаваць далейшыя дзеянні ЕС у падтрымку свабоднай, суверэннай і дэмакратычнай Беларусі”, — зазначаецца ў паведамленні.

На першай сустрэчы 29 чэрвеня прадстаўнікі ЕС і Беларусі “абмяняліся думкамі аб пагаршэнні сітуацыі з правамі чалавека ў краіне”, абмеркавалі пагаршэнне ўмоваў утрымання палітвязняў, “асудзілі саўдзел Беларусі ў агрэсіўнай вайне Расіі супраць Украіны”, а таксама “ўзмацненне ядзернай рыторыкі рэжыму, якая яшчэ больш пагражае суверэнітэту краіны”.

“Пасля фальсіфікаваных выбараў у жніўні 2020 года ЕС выдзеліў больш за 100 млн еўра на падтрымку беларускага народа, у тым ліку праваабарончых арганізацый, грамадзянскай супольнасці, незалежных СМІ, устаноў культуры, а таксама малых і сярэдніх прадпрыемстваў”, — зазначаецца ў паведамленні. Пры гэтым ЕС “па-ранейшаму гатовы актываваць” план фінансавай дапамогі ў памеры 3 млрд еўра на падтрымку дэмакратычнай Беларусі”, як толькі яна ўстане на шлях дэмакратычных перамен.

Святлана Ціханоўская, якая ўдзельнічала ў сустрэчы, прапанавала разгледзець ідэю прызначэння спецыяльнага прадстаўніка ЕС па Беларусі.