Белстат: Крэдыторская запазычанасць прадпрыемстваў за месяц вырасла на 1,4%

14 лістапада, Позірк. У студзені — верасні 2023 года рэнтабельнасць рэалізаванай прадукцыі склала 9% — на 0,3 працэнтнага пункта менш, чым за студзень — жнівень, паведамляе Нацыянальны статыстычны камітэт.

Рэнтабельнасць продажаў — 7,4% (за месяц не змянілася).

Паводле дадзеных Белстата, дэбіторская запазычанасць (запазычанасці прадпрыемству) на 1 кастрычніка склала 67,1 млрд рублёў (месяцам раней — 66,4 млрд; +1,1%), у тым ліку пратэрмінаваная — 9,9 млрд (10,1 млрд; -2%).

Крэдыторская запазычанасць (запазычанасці прадпрыемства) дасягнула 78,7 млрд рублёў (77,6 млрд; +1,4%), у тым ліку пратэрмінаваная — 9,8 млрд (не змянілася).

Паводле інфармацыі Нацыянальнага банка, запазычанасць па рублёвых і валютных крэдытах, выдадзеных банкамі юрыдычным асобам, на 1 кастрычніка 2023 года склала 50 млрд 344,6 млн рублёў.

Актуальная сума запазычанасці на 11,6% большая, чым было на 1 студзеня (45 млрд 128,7 млн), і на 19,2% перавышае запазычанасць, зафіксаваную 1 кастрычніка 2022-га (42 млрд 219,7 млн).

3 кастрычніка на нарадзе па продажах айчыннай прадукцыі Аляксандр Лукашэнка заявіў, што для беларускай эканомікі “пытаннем пытанняў” з’яўляецца дэбіторская запазычанасць. “Па “дэбіторцы”, я сказаў, ніякіх спасылак [не павінна быць] на тое, што дзесьці плацяжы не ідуць, яшчэ нешта”, — сказаў ён.

Паводле слоў Лукашэнкі, у Нацбанку і “спадарожных структурах” працуе “не адна тысяча” супрацоўнікаў. “Таму давайце разам з урадам займайцеся і пачынайце працаваць, калі можаце. А на гэтую тэму, зноў жа, больш размоў быць не можа”, — падкрэсліў ён.

10 сакавіка на пасяджэнні Савета міністраў Лукашэнка заявіў аб неабходнасці зніжаць долю стратных прадпрыемстваў у дзяржсектары, а таксама разабрацца з абавязкамі, без чаго “не будзе нармальнага функцыянавання эканомікі”.