Латушка перадаў прадстаўнікам Аўстрыі звесткі пра вываз украінскіх дзяцей, абмеркаваў шляхі вызвалення палітвязняў

8 снежня, Позірк. Звесткі пра “незаконны вываз у Беларусь украінскіх дзяцей” перадаў кіраўнік Народнага антыкрызіснага ўпраўлення (НАУ), намеснік кіраўніцы Аб’яднанага пераходнага кабінета (АПК) Павел Латушка на сустрэчы з прадстаўнікамі Аўстрыі, паведаміла 8 снежня прэс-служба АПК.

Адзначаецца, што палітык сустрўся з аўстрыйскім экспертам у галіне правоў чалавека Манфрэдам Новакам, паслом Аўстрыі ў Польшчы Андрэасам Штадлерам і намеснікам пастаяннага прадстаўніка гэтай краіны пры Савеце Еўропы Андрэасам Лінсам.

Латушка праінфармаваў суразмоўцаў пра накіраваныя ў Міжнародны крымінальны суд (МКС) у Гаазе матэрыялы па фактах перамяшчэння дзяцей, а таксама пра “ход расследавання злачынстваў Аляксандра Лукашэнкі і яго саўдзельнікаў”, якое праводзіць НАУ.

Сярод іншага бакі абмеркавалі “магчымыя шляхі вызвалення палітвязняў”, “супрацоўніцтва дэмсіл і Савета Еўропы”, “праблему легалізацыі грамадзян Беларусі ў Аўстрыі”. Палітык таксама паведаміў, што ўрадам дзяржаў, дзе цяпер жывуць беларускія грамадзяне, будзе перададзены даклад НАУ пра пераслед беларусаў за мяжой з боку афіцыйнага Мінска.

“Бакі дамовіліся аб пастаянным інфармаванні камандай НАУ Манфрэда Новака пра новыя падрабязнасці расследавання злачынстваў Лукашэнкі”, — гаворыцца ў паведамленні.

На XXI Мінскім форуме ў Берліне 4 снежня Латушка заявіў, што прыцягненне Лукашэнкі да крымінальнай адказнасці ў рамках універсальнай юрысдыкцыі з’яўляецца “найважнейшым інструментам” для расколу сістэмы ўлады ў Беларусі.

Сёлета 17 сакавіка МКС выдаў ордар на арышт прэзідэнта РФ Уладзіміра Пуціна і дзіцячага амбудсмена Марыі Львовай-Бяловай за вываз украінскіх дзяцей з акупаваных тэрыторый.

Беларускія дэмсілы дамагаюцца таго ж у дачыненні да Лукашэнкі. 13 верасня Еўрапарламент прыняў рэзалюцыю з заклікам да МКС разгледзець магчымасць выдаць ордар на яго арышт.