СМІ: Краіны ЕС могуць атрымаць права абмяжоўваць кампаніям з Беларусі і РФ доступ да еўрапейскай газавай інфраструктуры

8 снежня, Позірк. У Еўрасаюзе распрацаваны законапраект, які дасць магчымасць пазбавіць беларускія і расійскія кампаніі доступу да еўрапейскіх газаправодаў і тэрміналаў звадкаванага прыроднага газу (ЗПГ), піша брытанскае выданне Financial Times (FT) са спасылкай на праект дакумента.

У выпадку яго прыняцця любая дзяржава ЕС зможа блакаваць “часткова або, дзе гэта апраўдана, цалкам абмежаваць” газавым аператарам з Беларусі і РФ магчымасць закупляць магутнасці еўрапейскіх трубаправодаў і тэрміналаў ЗПГ. Мяркуецца, што такім чынам краіны ЕС змогуць “абараніць жыццёва важныя інтарэсы бяспекі”.

Акрамя таго, дакумент дасць энергетычным кампаніям Еўрасаюза “прававую аснову для скасавання кантрактаў” з расійскімі і беларускімі кампаніямі “без абавязацельства буйных кампенсацыйных выплат”.

“Гэты крок падкрэслівае працяг намаганняў ЕС па абмежаванні прыбытку Расіі ад энергапрадуктаў, паколькі вайна ва Украіне працягваецца. Еўрасаюз паставіў перад сабой мэту, якая заключаецца ў тым, каб дзяржавы-члены цалкам вызваліліся ад расійскага выкапнёвага паліва да 2027 года”, — піша FT.

Паведамляецца, што галасаванне было запланавана на 8 снежня. Вынік пакуль невядомы, аднак нават калі дакумент прыняты, паводле інфармацыі медыя, яго “канчатковую версію павінны ўхваліць” Еўрапарламент і Еўрапейскі савет.